La competicion mondiala de rugbi de XV comencèt divendres passat en Anglatèrra. Se debanarà d’aicí au 31 d’octòbre e reünís las melhoras nacions de la planeta ovala.

Pendent un mes e mieg los passionats de balon ovau van poder veire una competicion de las bèlas dins la quala s’afrontaràn las melhoras nacions tant de l’emisfèri sud coma dau nòrd. Las esquipas son repartidas en cinc grops. Los dos primiers de chada grop participaràn a las fasas finalas.
 
 
Grop A
 
Considerat coma lo grop de la mòrt, queu grop reünís tres grandas nacions: Austràlia, Anglatèrra e lo País de Galas. S’i tròba tanben l’esquipa de las Illas Fiji, championa dau Pacific en 2015. Uruguai n’es l’outsider. La partida de dubertura de la copa, divendres passat, opauset lo XV de la ròsa aus Fijians Volants.
 
Lo debut de rescontre d’Anglatèrra es estat daus bons emb dos eissais, un de penalitat en seguda a las progressions daus davants, l’autre conclús per l’arrier Mike Brown. Totparier los Volants juguèron plan emb una mesclada que metèt sos adversaris en dificultat. A la meitat, la marca èra de 18 a 8 en favor daus anglés. E mai se los fijians resistiguèron en debut de segonda meitat, los anglés inscriguèron dos eissais en fin de partida per ganhar 35 a 11 emb lo bònus ofensiu.
 
L’autra partida dins queu grop de la dimenjada opausèt lo País de Galas aus Teros uruguaians. L’esquipa sud-americana tenguèt un quart d’ora e mai menèt 6 a 0 davant que los galés rentrèron mai dins la partida. Lo XV de la porrada marcarà uech eissais dont un triplat d’Allen e un doblat de Davies. Un succès large per los cèltas 54 a 9 emb lo bònus ofensiu aquerit davant la meitat.
 
 
Grop B
 
Dins lo grop B, trobam l’Africa dau Sud, esquipa favorida, Escòcia, Japon, Samoa e los Estats Units. La batalha per la segonda plaça es dubèrta mai que mai dempuei la victòria nipona 32 a 34 fàcia aus Springboks.
 
Qu’es la granda suspresa dau debut de la competicion. E la segonda partida ganhada en Copa dau Mond per los jugadors japonés dempuei quela contra Zimbabwe en 1991. Se los sud-africans èran pas a lor melhor, los nipons an jamai laschat e mai èran dominats dins la possession de la bala e l’occupacion dau terren. Aitau, a la tota fin de la partida, pendent mai de cinc minutas, butiguèron davant la linha daus Springboks per reüssir a marcar l’eissai de la victòria gràcias a Hesketh. Los samoans, ilhs, batèron 25 a 16 daus americans que resistiguèron fòrça plan.
 
 
Grop C
 
Queu grop se compausa de la Nuòva Zelanda, championa en títol, Argentina, Tònga, Georgia e Namibia. La primiera partida daus All Blacks los mostrèron indisciplinats e lor faguèt una ora per se liberar contra daus Pumas que menèron a la marca. Finalament se’n surtiguèron plan fàcia a l’adversari mai mauaisat dau grop emb una victòria 26 a 16, que priva los argentins dau bònus defensiu.
 
Mas la suspresa dins queu grop ven de la victòria daus Lelos georgians contra los tongans. Aplicats dins la conquèsta, exemplars dins la defensa, los esquipiers de Mamuka Gorgodze, capitani georgian e jugador dau Club de Rugbi Tolonenc, an impressionat fàcia a de las Aglas de Mar timidas e maladrechas.  
 
 
Grop D
 
E mai França qu’es estada finalista de la darriera Copa dau Mond, e Irlanda que ganhèt lo Torneg de las Sieis Nacions en 2014 e 2015, sián favoridas, queu grop D sembla un dau mai dubèrt de la competicion. Itàlia poiriá rivalizar per la segonda plaça e Canadà mai Romania eissaiaràn de se posicionar.
 
Las doas primieras partidas an totparier confortats los dos favorits. Irlanda metèt una brava rosta aus canadians 50 a 7. França ganhèt 32 a 10 fàcia a daus Azurri italians fòrça indisciplinats aus quaus mancava lor capitani Sergio Parisse. Mas los Blaus perdèron un de lors jugadors importants: Yoann Huget, alier de l’Estadi Tolosenc, se nafrèt e poirà pas participar au demai de la competicion.
 
 
 
 
Maime Caillon