Dimècres e dijòus passats se debanèron quatre partidas dins la Copa dau Mond de rugbi en Anglatèrra: una per chada grop. La ierarquia mondiala es estada respectada e las esquipas favoridas que jugavan se son pogudas afirmar e consolidar lor plaça au classament.
 
 
Grop A: Austràlia - Fiji (28-13)
 
Qu’era la primiera partida per los Wallabies dins la competicion e mai lor primiera victòria. Totparier los Fijians Volants resistiguèron 25 minutas. Puei los australians, plan aplicats, faguèron montar la marca emb dos balons portats conclús per Pocock just davant la pausa. Dins la segonda meitat, Sekope Kepu, que junherà Bordèu Begla lo 1r de decembre, marquèt un eissai. Adonc los autralians podián esperar lo bònus ofensiu mas i arribèron pas: los fijians se reprenguèron. Los Wallabies deguèron defendre e mai Volavola, l’obreire fijian, reüssiguèt a marcar un eissai.
 
Austràlia se tròba a la tresesma plaça au classament darrier los galés e los anglés qu’obtenguèron lo bònus ofensiu dins lor partida. Si las Illas Fiji mai Uruguai semblan ja de pus poder se qualifiar per la fasa finala, la competicion demòra dubèrta dins queu grop de la mòrt.
 
 
Grop B: Escòcia - Japon (45-10)
 
Los japonés reüssiguèron pas dos esplechs de seguda. Tròp de fautas, d’indisciplina en primiera meitat, mai de segur de la fatiga quatre jorns après lor victòria contra los sud-africans. Quitament se comencèron per un eissai de Mafi a la 15a minuta, resistiguèron pas aus escocés que ne marquèron cinc e obtenguèron lo bònus ofensiu.
 
Emb quela victòria, lo XV dau chardon pren la tèsta au classament. Mas los outsiders japonés e samoans an enquèra la possibilitat d’accedir a la fasa finala.
 
 
Grop C: Nuòva Zelanda - Namibia (58-14)
 
Los champions dau Mond en títol batèron mai qu’aisadament una esquipa namibiana que sa defensa èra quasi inexistenta. Precís, rapids, los All Black marquèron 9 eissais dau temps que los Welwitschias n’inscriguèron un.
 
Après doas victòrias, la Nuòva Zelanda s’installa en tèsta dau grop C per i demorar: ni los georgians nimai los tongans semblan en capacitat de los batre.  
 
 
Grop D: França - Romania (38-11)
 
L’esquipa de França alinhada èra la daus remplaçants. Mas, quitament se ganhèt la partida emb lo bònus ofensiu, èra pas la nauçada de las esperanças de Philippe Saint-André, son entraïnaire. A la meitat, passèt una brava bufada aus jugaires dins los vestiaris.
 
Pas ben organizats, los francés an pogut marcar nonmàs quand èran en superioritat numerica pr’amor d’un carton rossèu contra un jugaire romanés. Menavan 17 a 6 a la meitat après un eissai dau bordalés Guitoune e un autre de Yannick Nyanga. Puei, a la represa, se passèt bona mieja ora sens que marquèsson e que los jarrics romanés se fatiguèsson. Adonc Guitoune, un còp de mai, lo clarmontés Fofana puei lo tolosenc Gaël Fickou marquèron chascun un eissai.
 
França es totparier primiera de son grop davant Irlanda. E las plaças qualificativas semblan asseguradas a quelas doas esquipas.
 
 
 
 
Maime Caillon