Segon d’informacions de France 24, lo 19 de julhet, l’Assemblada Nacionala francesa refusèt l’emendament sul contraròtle de las despensas dels deputats. En 2009, l’escandal de las despensas abusivas e de qualques autras despensas faraonicas efectuadas pels membres del Parlament de Westminster aviá provocat una pèrda de fisança dels britanics cap als lors òmes politics.
Cada mes, 6412 èuros d’indemnitats representativas de despensas de mandat (IRFM) son versadas als deputats, sus un compte separat, sens que calga qu’eles justifiquen las lors despensas. Aquela soma ven de completar lo salari mensual del deputat de 7100 èuros bruts. Al delà s’apondon egalament 9138 èuros bruts mensuals de “crèdit afectat a la remuneracion de collaboradors”, en servissent a remunerar los lors emplegats.
Refusat en Comission de las Finanças l’11 de julhet, l’emendament del centrista (UDI) Charles de Courson, que prepausava de fiscalizar una partida de l’IRFM, es estat tornarmai refusat la nuèch del 19 al 20 de julhet, amb 24 vòtes en favor e 108 contra.
“Ai ausit qualques unes dels mieus collègas dire que lo mieu emendament èra anticonstitucional. Aquò es escandalós!”, çò diguèt, a France 24, Charles de Courson.
En una entrevista concedida al jornal Le Monde, lo 24 de julhet passat, Bruno Le Roux, president del grop socialista a l’Assemblada francesa, declarèt: “Sénher de Courson, deputat dempuèi 19 ans, dont 14 en la majoritat, descobrís tard las vertuts de la transparéncia”.
L’Estat francés es a l’ora d’ara l’estat d’Euròpa mai generós cap als sieus parlamentaris: los deputats franceses son remunerats dos còps mai que los lors omològs de Westminster e quitament 77% de mai que qualque foncionari del Bundestag alemand, segon un estudi de l’Institut Francés per la Recèrca sus las Administracions e las Politicas Publicas (IFRAP).
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
Que cau precisar qu'es M. Charasse, a l'epòca responsable del Budgèt e de las finanças, cresi, e ara membre deu Conselh constitucionau, que defiscalizèt l'IRFM : cf. Antiparlamentarisme primari suu men blòg…
« Urosament que la Republica e’us balha uas compensacions. En sus deus 5514,68 € brut per mes, que receben ua segonda indemnitat mensuau (IRFM) de 6200 € ende l’ensems deus frais que pòdon aver e que ne son pas pres en carga per l’Assemblada nacionau – sens comptar lo trin a gratis en prumèra classa, l’avion enter París e la lor circonscripcion e dotze viatges de mei dens l’exagòn, etc.
E tot aquò sens aver a balhar nada justificacion.
Entà copar cort a tota curiositat mausana, lo ministre Charasse, en 2002, que defiscalisè l’IRFM.
René Dosière que lucha contra los abús dens aqueth domeni qu’es plan solet ! »
E tot lo monde que saben que M. Charasse es un socialista rigorós, aunèste ideologicament parlant, etc.
René Dosière qu'es estat relegit sens aver recebut l'oncion del PS peu prumèr torn. Los sons amics socialistas ne'u van pas ajudar dens la soa luta ende mei d'aunestetat, de segur.
Dreta e esquèrra que s'arrapan aus lors privilègis quand s'ageish de moneda e d'acumulation de mandats.
D'aquèl exemple se vei la dificultat d'un sistèma a se reformar e evoluar de l'interior e de per se. Una bèla ocasion de mancaa en aquèl periòde. D'un autre temps Balladur diiá : chal far de sacrificis. Per lo moment sembla que síjon totjorn los meme a o far.
Una precision : juridicament, lei deputats francés an pas drech an'un salari mai a n'una indemnitat. Es pron diferent quora s'agis de levar leis impòts e lei diverseis escotissons socialas ( a son avantatge, precisi).
Se que non, òc, es un escandau, d'autant mai que la part d'aqueleis "ajudas" d'IRFM siervon de finançar soventei fés d'emplecs d'assistant parlamentaris dins la familha dau deputat, per fin que demòre dins lo cèucle familiau l'argent.
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari