Lo burèu del procuraire general de Soïssa confirmèt divendres passat qu’a dobèrt una procedura penala contra lo president de la FIFA, Joseph Blatter, per “sospiècha de gestion desleiala e subsidiàriament abús de fisança”, segon çò que rapòrta dins un comunicat. Se met Blatter en examen per un contracte que signèt lo 12 de decembre de 2005 amb l’Union de Fotbòl de la Cariba. Aquel contracte foguèt economicament desfavorable per la FIFA, ja que se sospiècha que Blatter agiguèt contra los interèsses de l’organisme que presidís.
 
Tanben s’es mes en examen un pagament de dos milions de francs soïsses al president de l'UÈFA, Michel Platini, per un trabalh fach entre genièr de 1999 e en junh de 2002. L’argent se seriá tansferit al compte de Platini en 2011.
 
 
Qualques dirigents de la FIFA foguèron detenguts lo 27 de mai
 
Lo 27 de mai passat detenguèron a Zuric (Soïssa) qualques dirigents de la FIFA, en seguissent l’òrdre de la justícia estatsunidenca, que ne demandèt l’extradicion per los jutjar per presumida corrupcion. Son acusats de fraudariá, extorsion e emblanquiment d’argent pendent los darrièrs vint ans, tocant l’atribucion de las copas mondialas de fotbòl a certans païses e los acòrdis de marqueting e dels dreches televisius. Demièg los detenguts i a un dels vicepresidents del comitat executiu de la FIFA, Jeffrey Webb, de las Illas Caiman; un autre vicepresident, Eugenio Figueredo, d’Uruguai; e l’èx-membre del comitat Jack Warner, de Trinitat e Tobago.
 
Justament l’endeman d’aquelas detencions se faguèt d’eleccions a la presidéncia de la FIFA, que Joseph Blatter i ganhèt la reeleccion. Mas en aquel moment Blatter demissionèt e demandèt de nòvas eleccions per elegir lo sieu successor. En aquel moment Blatter se vegèt pas tocat dirèctament per aquela operacion.