A la session d’ièr, diluns, del Parlament d’Ucraïna, lo Partit de las Regions, del president Viktor Ianukovych, ensagèt de convéncer lo president de la cambra legislativa, Volodymyr Lytvyn, per que signèsse lo projècte de lei qu’impausa lo rus coma lenga cooficiala en qualques regions del país.

Ianukovych capitèt, al començament del mes, que lo parlament aprovèsse aquela lei, sens la sometre al procès normal de revision del tèxt. Lytvyn la volguèt pas signar, formalitat necessària per que la poguèsse tanben signar lo president del govèrn e per que la lei intrèsse en vigor. Pr’amor d’aquò, lo Partit de las Regions ensaja de convéncer lo president de la cambra.
 
L’ucraïnés es la lenga oficiala de l’estat, e la nòva lei cooficializa lo rus dins qualques províncias de majoritat russa (la mejana dels russofòns es de 10% en Ucraïna). Russia quicha dempuèi d’annadas las autoritats d’Ucraïna per que declaren lo rus oficial.
 
Lo projècte de lei del Partit de las Regions a desencadenat fòrça protèstas en Ucraïna, amb de susmautas entre los manifestants e la polícia. I a agut tanben de protèstas dins lo parlament, ont los partits de l’oposicion an avisat qu’oficializar lo rus en Ucraïna es un atac a la constitucion. Per protestar, quitèron los sètis del parlament e los cobriguèron amb de grandas bandièras nacionalas lo jorn que s’aprovèt la lei.