Vei-nos-quí a la meitat de las fasas qualificativas: chada esquipa a jugat doas partidas levat las Illas Tònga e Namibia que lor ne manca una. Qu’es lo moment de veire las tendéncias que se desgatjan.

Las partidas de quela dimenjada an pas portat de surpresa mas las esquipas favoridas contunhan de confirmar lor supremacia sus lo rugbi mondiau. Vos prepausam de ne far lo bilanç e de veire las perpectivas possiblas dins chada grop.
 
 
Grop A: los anglés s’aluenhan de la qualificacion
 
Dins queu grop dich de la mòrt, avèm vist dissabte la confrontacion de dos favorits: Anglatèrra contra lo País de Galas.  Maugrat fòrça jugaires bleçats, los galés an reüssit a s’impausar 25 a 28 fàcia aus locaus. Totparier, las nafraduras an contunhat dins quela partida d’aicí a la 67a minuta. Adonc que lo XV de la ròsa menava 25-18, a la 71a minuta, lo galés Lloyd Williams ofriguèt un eissai a Gareth davies per un còp de pè de recentratge. A la 77a minuta, los anglés chausiguèron la tòcha pusleu que la penalitat e perdèron una ocasion d’egalizar, laissant la victòria a l’esquipa cèlta.
 
Los Wallabies, ilhs, batèron aisadament los Teros uruguaians 65 a 3. En 30 minutas avián ja marcat los 5 eissais necessaris au bònus ofensiu.
 
Se la segonda plaça es enquèra accessibla aus tres favorits, los anglés an pus drech a l’error e devon ganhar lors doas partidas venentas. Quela contra Austràlia serà decisiva.
 
 
Grop B: lo retorn daus Springboks
 
Emb lo retorn de lors jugaires importants, mai d’un rugbi plan classic mas eficaç, los sud-africans an pogut ganhar 46 a 6 lor segonda partida contra los samoans. Los americans per contra an pogut raivar pendent la primiera meitat de far coma los nipons. Menavan 13 a 6 fàcia au XV dau chardon. Mas los escocés revenguèron dins la segonda meitat emb mens de fautas fachas e obtenguèron lo bònus ofensiu.
 
L’episòdi japonés sembla oblidat per los Boks que fan lor retorn demest los favorits dau grop. Mas la victòria daus nipons per lors doas partidas venentas es possibla, çò qu’implica per los sud-africans de ganhar contra Escòcia per se qualificar.
 
 
Grop C: Argentina s’impausa fàcia a Georgia 54 a 9
 
Tròp d’indisciplina en debuta de partida dau costat argentin faguèt que la marca a la meitat era nonmàs de 14-9. Faudrà esperar la 45a minuta e lo carton rossèu contra Mamuka Gorgodze per que los Pumas se desvelhen. Marquèron 3 eissais dins las 5 minutas que seguèron.
 
Las partidas venentas semblan de pas poder chamjar lo classament dau grop. Los All Black son ben installats en primiera plaça dau temps que los argentins n’an la segonda.
 
 
Grop D: Irlanda confirma e Itàlia subrenada
 
L’Squadra Azzura, encara privada de son capitani Sergio Parisse, faguèt una partida pas plan brava fàcia a daus canadians combatius. Mas lor defensa tenguèt e ganhèron 23 a 18. Los irlandés per contra batèron larjament l’esquipa romanesa 44 a 10 en tot far una partida quasi perfiecha.
 
Dins queu grop tanben, pas una surpresa sembla de poder chamjar lo naut dau classament. L’ultima partida entre França e Irlanda serà decisiva per saubre quala esquipa afrontarà la Nuòva Zelanda, championa dau Mond en títol per lo primier quart de finala. 
 
 
 
 
Maime Caillon