En aquesta fin de vèspre del darrièr dissabte de julh, dins la calorassa rosselhonesa, las causas foguèron mai complicadas que previstas pels Dracs facia als darrièrs de la Super-Liga: los Cavals-Fòls de Londres. Agèron tornar quauques problèmas amb l’arbitratge-videò sus l’acceptacion d’un ensag dels angleses e lo refús de doas realizacions seunas.
 
Trent Robinson aviá causit de faire virar l’efectiu e aquò compliquèt l’eficacitat catalana. D’entrada, lo còp de pè d’entama londonian tustava un pal, tornava en jòc e se transformava sul pic en ensag pels vesitaires. Mas a la 8a minuta, los Dracs replicavan per Jason Baitieri mes sus orbita per Scòtt Dureau. Los Catalans se mostravan malaisits e los Londonians ne profitavan per prendre l’avantage per un novèl ensag al quart d’ora de jòc.
 
Lo capitani Casty se vesiá refusar un ensag per l’arbitre-videò per una rason escura e reveniá al talonaire Ben Fisher de remetre los Dracs a nautor del l’adversari a la mièja-ora de jòc en s’escapant al ras del tengut.
 
Dins lo segond temps, los Dracs se mostrèron fòrts en defensa e marquèron pel centre Darryl Milard que serpentejava dins la defensa dels jaune-e-negre. Scòtt Dureau assegurava la victòria per un tombat a dètz minutas del tèrme: 19-12.
 
Dimenge, los Catalans aniràn desfisar los Gigants d’Huddersfield. Demòra d’esperar que tornaràn trapar una fòrma olimpica! Lo Comitat d’Organizacion de la Copa del monde de 2013 ven de rendre public lo calendièr dels rescontres.
 
La competicion se dobrirà lo dissabte 26 d’octòbre al Millenium de Cardiff amb los rescontres Australia-Anglatèrra e Galas-Italia.
 
França jogarà lo dimenge 27 d’octòbre a Hull contra la Papoa-Nòva-Guinèa abans de reçaupre lo divendres 1r de novembre los campions del monde, los Kiwis de la Nòva-Zelanda a Avinhon, puèi Samoa lo diluns 11 de novembre a Brutús a Perpinhan.
 
Dins aquel Grop B, aquel de França, caldrà èsser dels 3 primièrs per se qualificar pels quarts. La Copa 2013 veirà sas doas mièja-finalas se jogar a Wembley lo dissabte 23 de novembre e la finala a Traffòrd lo Vièlh a Mancheter lo dissabte 30 de novembre.
 
Lo centre anglés Stuart Reardon, que ven de prene part al doblat de l’ASCarcassona mas qu’es en cèrca d’un club per la sason venenta, perseguís en parallèl sa carrièra de manequin e ven de pausar nus, lo balon al cap de las mans, per una mòstra en Olanda consacrada als esportius en omenatge als Dieusses de l’Olimpa. E dins aqueles espòrts, lo Stuart representa doncas lo 13.
 
Ara, sabi pas se los Grècs portavan sus la mitat del còs tatoatges maoris (o etnics, coma se ditz) e se disián, “Lo XIII, aquò òczakis!”