Lo govèrn de Marròc auriá empedit l’inauguracion d’una grand magazin Ikea a Casablanca, qu’èra prevista per dimars passat. L’intencion del govèrn suedés de reconéisser la Republica Aràbia Saharauí Democratica (RASD, Sahara Occidental) auriá pas plagut al govèrn alauita, qu’auriá, donc, enebit l’inauguracion del primièr magazin en Magrèb de la societat suedesa de mòbles lo quite jorn qu’èra prevista.
 
Segon un comunicat del govèrn civil de Casablanca, “lo projècte d’Ikea a pas de certificat de conformitat e, per tant, l’inauguracion prevista pel 29 de setembre es estada anullada”. Per contra, Ikea Marròc assegura que decidiguèt d’anullar l’inauguracion per poder conclure qualques trabalhs d’installacion.
 
Ikea aviá presentat als mèdias son sit de 27 000 mètres cairats, que seriá lo primièr de Magrèb. Mas en aquel moment lo primièr ministre Abdel-Ilah Benkiran convoquèt los principals partits parlamentaris per lor comunicar que Suècia aviá l’intencion de reconéisser la Republica Aràbia Saharauí Democratica, l’estat proclamat pel Front Polisario.