Actualitats
MRG: los “assassinats extrajudiciaris” en Papoa Occidentala “atenhon de proporcions inacceptablas”
Mòr un menor papó de las mans de la polícia, que cercava “d’agitaires’’. L’organizacion pròdreches reclama una enquista immediata. La familha del dròlle assegura que se tracta d’un assassinat politic.
La mòrt d’un jove papó de las mans de la polícia indonesiana a menat lo Minority Rights Group (MRG, Grop pels Dreches de las Minoritats) a afortir que “los assassinats extrajudiciaris en Papoa Occidentala an atengut de proporcions inacceptablas”.
Los faches, segon lo relat d’MRG e d’autras organizacions papós, que citan de testimoniatges locals, aguèron luòc lo 28 de setembre a Timika. La polícia intrèt dins una residéncia d’estudiants en cèrca “d’agitaires” que lors parents apartenián al movement independentista papó. Dos dels dròlles, cadun de 17 ans, assagèron de fugir e la polícia lor tirèt dessús. Un d’eles, Kaleb Bogau, moriguèt sul còp, e l’autre, Efrando Sobarek, se tròba a l’espital en estat critic.
MRG a demandat una “enquista immediata” sus l’episòdi e a dich que, se se confirma lo relat de las fonts localas, se tracta d’una violacion de “totas las nòrmas e estandards internacionals de dreches umans”.
La familha de Bogau, pròcha del Comitat Nacional de Papoa Occidentala (KNPB), una organizacion independentista de la societat civila, a qualificat la mòrt del jove d’assassinat politic.
Lo meteis jorn, se passèt una manifestacion per las carrièras de Timika en protèsta per la mòrt del jove.
Las organizacions independentistas de Papoa Occidentala —tant las associacions pacificas coma los grops armats— patisson despuèi de decennis la persecucion politica, militara, judiciària e policièra de l’estat indonesian.
Anciana colònia neerlandesa, la Papoa Occidentala foguèt ocupada per Indonesia en 1963 e annexada formalament en 1969, après un referendum ont sonque se permetèt la participacion d’un milièr de personas. Los independentistas argumentan que la Papoa Occidentala foguèt pas jamai descolonizada formalament e que, per tant, caldriá organizar un referendum d’autodeterminacion sul territòri.
Aqueste article es adaptat de Nationalia amb qui Jornalet a un acòrdi de cooperacion
Articles relacionats
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
Colonizacion dels malais generala, un scenario a la China vs Tibet.
Indonesia es un país que cerca garrolha etnicoreligiosament: recordatz vos de Timor, Moluques, Bali, Banda Acheh.
Aqueles olandeses son nets sus eles en Euròpa mas an daissat de braves merdièrs dins los ancianas colonias. An pas besonh d'èsser geloses dels colonisaires franceses sus aquel sicut! Enfin, que los antipapistas valon pas mai que los papistas.
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari