Actualitats
Dos païses se proclaman "liures" en Africa dins la meteissa setmana
Los rebèls toarègs proclaman la liberacion d'Azawad, e lo Conselh Nacional de Barotseland a decidit d'iniciar lo camin cap a l'independéncia a respècte de Zambia
Los rebèls toarègs proclaman la liberacion completa d'Azawad après l'ocupacion de las vilas de Tomboctó e de Gao. L'armada de Mali, vencuda, a pas pogut afrontar l'avançada de l'MNLA. En Zambia, lo territòri de Barotseland comença un “divòrci tranquil” per se restablir coma “nacion sobeirana”.
Las conquistas de las vilas de Kidal, Gao e Tomboctó la setmana passada an portat lo Movement Nacional per la Liberacion d'Azawad (MNLA) a proclamar "la liberacion" completa d'aquel territòri qu'ocupa tota la mitat nòrd de Mali. L'eveniment a coïncidit dins la meteissa setmana que Barotseland, un territòri de la zòna occidentala de Zambia, a decidit d'iniciar un procès per tornar devenir una "nacion sobeirana".
Azawad: independéncia de facto
Çò de mai estonant de la lucha per l'independéncia d'Azawad es estat la rapiditat que los combatents, la majoritat toarègs, an atengut l'establiment d'un estat sobeiran de facto, pas encara reconegut internacionalament. Fa mens de tres meses que l'MNLA aviá iniciat tornar-mai una rebellion toarèg. Los rebèls son intrats la dimenjada passada a Tomboctó e a Gao, vilas de la ribièra de Nigèr ont la majoritat de la populacion es pas toarèg mas songhai. Es pas ges clar quala serà l'actitud d'aquelas gents davant una revòlta essencialament protagonizada per de toarègs.
L'avançada dels rebèls toarègs es estada dirèctament proporcionala a la desfacha de l'armada maliana, qu'a liurat practicament Gao e Tomboctó sens cap de resisténcia. Quitament de membres eminents de l'armada son passats del costat dels toarègs, que comptan amb d'armas provenent de la recenta guèrra de Libia e qu'a lo sosten d'Ansar Dinni, una milícia islamista. Ça que la, l'MNLA se declara luènh de las accions dels islamistas, que vòlon impausar la sharia en Mali.
"Divòrci tranquil" en Barotseland
A de milièrs de quilomètres al sud, l'ancian reialme de Barotseland a decidit d'iniciar lo camin cap a l'independéncia de Zambia. Los delegats del Conselh Nacional Baròtse (BNC) aprovèron la setmana passada una resolucion per que Barotseland inície un "divòrci tranquil" de Zambia pr'amor de restablir lo sieu "estatut original coma nacion sobeirana".
Lo BNC considèra que Zambia a abolit de facto l'Acòrdi de Barotseland de 1964, que lo territòri obteniá una cèrta autonomia en escambi de la siá integracion dins l'Estat zambian. La responsa a aquò, ditz lo BNC, pòt pas èsser que la denóncia dels faches davant l'Union Africana e l'ONU en tot proclamar l'independéncia.
Aqueste article ven del jornal catalan Nationalia.cat, amb qui Jornalet a un acòrdi de cooperacion.
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
Es vertat qu'a l'ora d'ara, amb la pression demografica e los enjòcs economics, Africa es venguda una granda zòna de tensions. En mai d'aquò, las frontièras son plan sovent traçadas sens cap de relacion amb l'istòria o las lengas.
Cal ajustar que l'estatut de las lengas africanas (sovent denegadas dins sas foncions publicas) e l'idèa d'estats-nacions unitaris, ajudan pas los païses a se desembolhar de tots aqueles problèmas.
La rapiditat de la desfacha de l'armada maliana es pas talament estonanta. Coma iò ditz l'article l'MNLA a combatut emb las armas libianas e mai emb los islamistas d'Ansar Dinni e de l'AQMI (Al Qaida au Magreb Islamic). L'armada maliana aviá pas de que resistar a las armas de çò qu'era una de las armadas mai poderosas d'Africa. Quò era la causa de la mutinariá mai dau còp d'Estat dau 22 de març a Bamako.
Aura n'i a doas questions per la sega dau conflicte : l'actitud de l'MNLA fàcia aus islamistas que vòlen impausar la sharia au Mali entier e la de la CDAO que vòu pas veire lo conflicte s'espandre en defòra dau Mali.
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari