Un vintenat de mòrts e gaireben quaranta ferits es lo bilanç de las victimas d’un bombardament que d’avions dels Estats Units faguèron dissabte de matin sus un espital de Mètges Sens Frontièras (MSF). Los mòrts son dotze mètges e sèt pacients, dont tres enfants. L’organizacion de cooperacion internacionala considèra que se tracta d’un grèu atac contra los dreches umans e exigís una enquèsta als Estats Units.
 
De son costat, lo secretari de la defensa estatsunidenc diguèt que se metiá en examen çò que s’èra passat amb lo bombardament de Kunduz. “Avèm enregat una enquèsta sus aquel incident tragic e tenèm la coordinacion amb lo govèrn afgan”.
 
Segon MSF, mandèron fa de jorns las coordenadas GPS de l’espital a l’OTAN e a las autoritats afganas.
 
Lo Naut Comissariat de l’ÒNU pels Dreches Umans, Zeid Raad Al Hussein, denoncièt lo caractèr “possiblament criminal” del bombardament que qualifiquèt de “tragic e inexcusable”. Hussein tanben n’a demandat una enquèsta.