Après aténher l’aur en 2000 e en 2004, lo bearnés Tony Estanguet venguèt campion olimpic arser per lo tresen còp. Lo bearnés escampa aital la decepcion de la siá eliminacion en mièja finala a Pequin, fa quatre ans.
“Es pas important d’intrar dins la legenda. Çò important, es d’o aver fach, es un moment plan fòrt per ieu, m’a calgut batalhar pendent quatre ans, aquò es pas estat simple per ieu pendent quatre ans, après Pequin”, çò diguèt Estanguet a France 2. Cal dire qu’a Pequin, l’esportiu bearnés foguèt eliminat en mièja finala.
“Lo scenari es totun fòrça bon, ai pas fach res d’excepcional en mièja finala, sabiái que seriá dur a la finala, sustot caliá pas far cap d’error e i soi arribat. O ai fach al bon moment,” a apondut Estanguet. Es passat davant l’alemand Sideris Tasiadis, qu’aviá fach lo melhor temps de la mièja finala, e davant l’eslovac Michal Martikan, campion a Pequin e a Atlanta (1996).
Amb 34 ans, Tony Estanguet èra estat, al delà, tres còps campion del mond (2010, 2009, 2006).
En natacion, la niçarda Camille Muffat ganhèt l’aur al 400 mètres liures. Atanben, lo provençal Yannick Agnel aguèt l’aur al 200 mètres liures. Encara en natacion, al 4 còps 100 mètres liures, los provençals Yannick Agnel, Alain Bernard, Fabien Gilot e lo niçard Clément Lefert, en fasent esquipa amb los franceses Amaury Levaux e Jérémy Stravius, obtenguèron totes ensems la medalha d’aur.
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
Viva la vaca! Biarnés cap e tot!
Òsca !
Jamai estancar la set de victòria....
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari