La Coordinacion d’Unitat Populara (CUP), qu’es un grop de l’esquèrra independentista dels Païses Catalans e d’Aran, e que nasquèt dins l’encastre del municipalisme, a agut fòrça resson dempuèi qu’es representada al Parlament de Catalonha, e quitament es venguda una referéncia per de movements internacionals d’esquèrra. En agost passat se presentèt en Escòcia lo movement RISE, que se reconeguèt inspirat a la CUP.
 
Qualque temps puèi, en seguida de la crisi de Syriza dins lo govèrn grèc, lo corrent critic d’aquela coalicion, la Plataforma d’Esquèrra, anoncièt que se presentariá a l’eleccion del 20 de setembre amb una candidatura diferenta del partit d’Alexis Tsipras. Un dels representants d’aquela nòva plataforma, Stathis Kouvelakis, professor dins lo King’s College de Londres, diguèt fa gaire qu’un de sos referents èra la CUP.
 
An seguit tanplan l’inspiracion de la CUP qualques movements secessionistas de l’estat espanhòl. Es lo cas de Comunidad Comunera, d’independentistas castelhans que revendican de crear una “CUP castelhana”. Aquel movement castelhanista, que promòu lo debat e l’activacion d’un espaci sobeiranista e anticapitalista en Castelha, s’es talament inspirat de la CUP qu’a fach quitament una crida per crear una CUP dins son país: