Fins a dissabte passat, la Republica de Fiji fasiá partida del grop de païses (coma Austràlia, la Nòva Zelanda e Tuvalu) que dins la bandièra estatala tenián l’Union Jack, en remembre del ligam colonial amb lo Reialme Unit. Dins lo cas del petit archipèla de l’Ocean Pacific, dissabte passat, lo govèrn profechèt del jorn nacional per quitar la bandièra establida en seguida de son independéncia fa 45 ans. Èra una bandièra, o cal dire, qu’en mai de l’Union Jack en un canton, compreniá tanben l’eraudica anglesa dins l’escut.
 
L’idèa de crear una nòva bandièra nacionala per rebatre “sa posicion dins lo Mond coma un estat-nacion modèrne e independent” comencèt en 2013, mas calguèt esperar fins en febrièr passat quand lo primièr ministre Voreqe Bainimarama anoncièt l’establiment d’un procès participatiu per ne causir una de nòva: “La bandièra actuala representa lo nòstre passat, pas lo nòstre futur”.
 
Après qualques meses de deliberacions d’expèrts e de la seleccion de qualques modèls, s’es dobèrt un procès de consultas publicas fins a decembre que ven per causir la bandièra ganhanta.
 
 
E l’an que ven, la Nòva Zelanda
 
En parallèl amb lo procès de Fiji, lo govèrn de la Nòva Zelanda trabalha tanben per cambiar sa bandièra actuala, que compren tanplan l’Union Jack dins un canton. L’an que ven los neozelandeses votaràn en referendum se mantenon la bandièra actuala o s’òptan per un nòu modèl qu’es a mand de se causir.
 
Dins la vesina Austràlia, ont la bandièra compren tanben l’Union Jack, i a de grops que prepausan lo cambiament de la bandièra “amb de referents colonials” mas, per ara, la question es pas intrada dins l’agenda politica.