Lo Parlament francés aprovèt dimars passat lo primièr grand paquet de reformas del govèrn de François Hollande, que prevei d’aumentacions d’impòstes als salaris nauts e a las grandas entrepresas coma solucion per combatre lo deficit naut.

Aquelas mesuras preveson, coma o prometèt la còla economica de François Hollande, la reduccion de la TVA fins a 19%. L’executiu precedent, presidit per Nicolas Sarkozy, aviá aprovat d’aumentar aquel impòst a 21% a partir d’agost. La mesura, doncas, èra pas en vigor e Hollande ven de la tombar. Per contra, se contrarotlarà las oras de trabalh suplementàrias, al delà de las 35 oras setmanièras.
 
Mas la proposicion mai ardida es l’implantacion d’una taxa de 75% pels qu’ajan de revenguts superiors al milion d’èuros. Es una mesura excepcionala, destinada a palliar lo deficit de l’Estat. Lo debat sus la justícia o l’injustícia d’aquela taxa se vei exemplificat per l’engatjament de Zlatan Ibrahimović al París-Saint-Germain. Lo jogaire recebrà 14 milions d’èuros, mas lo fisc francés ne recebrà mai de 60.
 
Es un primièr passatge fàcia a la modificacion de l’impòst de solidaritat sus la fortuna (ISF) previst pel budget de 2013. Amb la novèla mesura aprovada, dins lo debat parlamentari, per melhorar lo budget d’ongan e estalviar entre 6000 e 10 000 milions d’èuros suplementaris, lo govèrn espèra de recobrar qualques 2,3 miliards d’èuros addicionals.