Aperaquí 250 000 personas, segon los organizaires, —100 000 segon la polícia— manifestèron dissabte passat a Berlin contra lo Partenariat Transatlantic de Comèrci e Investiment; es aquel tractat que cèrca de crear un granda Aira Transatlantica de Liure Escambi (TAFTA). Los manifestants denóncian que l’acòrdi es antidemocratic e que supausa una reculada dins los estandards de seguretat alimentària, del mercat del trabalh e de l’environament.
 
“Aquò es la manifestacion mai granda dins aqueste país dempuèi fòrça, fòrça ans”, çò afirmèt lo director del movement ciutadan Campact, Christoph Bautz, quand parlèt als participants. “Çò mai important es que vòli pas que totas las nòstra leis sus lo consume se rebaissen e vòli pas aver una dictatura impausada per las entrepresas”, çò disiá un dels participants a Reuters TV.
 
Tanben manifestava lo deputat del grop parlamentari del Partit d’Esquèrra, Dieter Bartsch, que denoncièt la manca de transparéncia dins las negociacions. “Nos cal saber ara çò que se decidís”, çò diguèt.
 
De son costat, lo ministre de l’economia alemand, Sigmar Gabriel, critiquèt l’”alarmisme” dels manifestants dins un article publicat dins los mèdias. “Avèm l’oportunitat de fixar d’estandards novèls e positius per lo comèrci global creissent amb d’estandards ambicioses per l’environament e per los consumaires, amb de condicions justas per los investiments e los emplegats. Aquò deu èsser la nòstra tòca”, çò argumentava.