L’ÒNU comença d’èsser fatigada de tanta convèrsa e pauques resultats. La mitat del país a un parlament que non es reconegut per las autoritats internacionalas e l’autra mitat contunha de luchar contra la menaça islamista qu’avança sens pausa. I a de regions senceras que ja an declarat la lor obesissença e leiautat a l’Estat Islamic iraquianosirian; e divèrsas tribus localas coma los toarègs e los tobos son al mièg d’una pichona guèrra civila que non ajuda pas aquel país a sortir de la prigonda crisi en la quala entrèt après la mòrt de Muammar Al Qadhdhafi.
 
Ara la Mission de Sosten de las Nacions Unidas en Libia (UNSMIL) a fixat un ultimatum indirècte als islamistas de Trípol en tot dire que lo temps de las paraulas comença de finir pr’amor que la populacion libiana patís lo terrorisme, la fam e benlèu lo collapse economic. Per tant vòlon que lo govèrn de Trípol de jonga un còp de mai a las negociacions de patz per liberar Libia de la guèrra.
 
Tot comencèt aqueste mes de setembre passat, quand lo cap de la delegacion del Congrès General de la Nacion, lo govèrn de Trípol davant l’ÒNU, Salah Al Mahkzum, demissionèt de sa carga. Cal pas desmembrar que lo govèrn islamista es pas estat reconegut per la comunautat internacionala pr’amor qu’es constituit per los Fraires Musulmans, un partit islamista radical que ja es estat enebit en Egipte.
 
“L’ÒNU es estada informada que lo Congrès General de la Nacion participarà pas mai a las conversacions qu’an luòc en Marròc”, çò confirmèt l’ÒNU a travèrs d’un comunicat. Pasmens, “manten son engatjament dins lo procès de dialòg e sa volontat es d’i participar lèu”.
 
Mas aquela crisi intèrna dins lo govèrn islamista de Trípol pòt, benlèu, menar Libia a la malescasuda de las convèrsas de patz qu’an luòc en Marròc. Per tant, l’ÒNU vòl finir lèu aquelas convèrsas. Libia es de mai en mai devesida e cal entrar dins l’estapa finala de las negociacions.
 
 
Conflicte amb divèrsas faccions
 
Per comprene çò que se passa en Libia cal pensar a 2012 , quand tot lo país s’aucèt contra lo dictator Qadhdhafi. Mas puèi se vegèt que cadun aviá lo sieu pròpri interès e qu’aqueles, sovent, èran pas los meteisses. Aital, d’un costat avèm lo govèrn de Trípol, a l’oèst del país, opausat amb lo govèrn de Tubruq, a l’èst del país. Lo primièr es compausat d’islamistas coma los Fraires Musulmans e a las milícias de l’Aliança de l’Alba e las Brigadas de Misrata coma armada. An lo sosten de païses coma Qatar, Turquia e Itàlia.
 
De l’autre costat, lo govèrn de Tubruq es dirigit per lo general Jalifa Haftar qu’en mai d’ongan s’aucèt en armas contra los islamistas en Bengazi. A lo sosten diplomatic d’Egipte, dels Estats Units, de l’Arabia Saudita e de França. Lo defendon las Brigadas de Zintan e las Brigadas Cirenaïcas.
 
Demest aqueles, l’Estat Islamic proclamèt en son bastion de Darna un emirat leial a l’Estat Islamic asiatic. Après la sieuna declaracion d’aliança amb l’Estat Islamic en 2014, ocupèron tanben Nafariya, Sirti e Bengazi e son un grand perilh per tota Libia.
 
E mai, divèrsas etnias coma los tobos e los toarègs demòran dins una guèrra que sembla pas de finir. Los tobos son de raça negra e demòran dins las montanhas de Tibèsti. Non i a de chifras sus la lor populacion. Davant eles, i a 60 000 toarègs que luchan dempuèi la vila d’Ubari contra los primièrs. Mas la situacion es malaisida.
 
E mai s’en junh i aguèt un alta al fuòc, la vida dins aquela vila es realament malaisida. I a pas d’espitals, ni d’aiga ni d’aliments. Sos 35 000 abitants toarègs resistisson contra un sètge dels tobos sens ressorsas. Lo lor cap, Abu Baker, foguèt assassinat pendent las darrièras setmanas en Issa e ara cèrcan d’aliats dins la rèsta del país pr’amor que veson que pòdon pas ganhar totes sols contra los tobos.
 
Amb un panorama aital cal que la comunautat internacionala agache melhor çò que se passa en Libia. Se non se fa mai d’esfòrces economics e diplomatics, benlèu la guèrra civila contunharà e lèu i aurà un autre país en Africa qu’aurà pas pus de govèrn, coma Somalia. Mas Libia es plan prèp d’Euròpa.
 
 
 
 
Christian Andreu