Tornarmai a Marselha se vòl menar a tèrme un projècte d’amainatjament urbanistic sens consultacion dels abitants, que sembla que son pas brica d’acòrdi. Un collectiu ciutadan de la Plaça Joan Jaurés, coneguda popularament coma la Plana, organizèt un debat sus aquel projècte, ont èran convidats los abitants, los comerçants, los forans e los usatgièrs per debatre d’aquela operacion.
 
Lo projècte vol cambiar l’amainatjament de la plaça en tirant lo mercat e en remplaçant los comèrcis per d’autres mai orientats vèrs los toristas e vèrs la clientèla de nauta gamma. Lo projècte tanben cèrca de cambiar la circulacion de la plaça, que se prevei de passar “de dos a una via de circulacion en sens unic per limitar la plaça dei veituras” e a una pista ciclabla. Tanben son previstas mai de camèras de videosusvelhança.
 
Los vesins planhon d’aver pas recebut cap de comunicacion oficiala sus un projècte que lor agrada pas brica. Dins aquel mercat, la vila vòl poder causir los “comerçants non sedentaris” e, per tant, vòl “reduire lo nombre d’emplaçaments” per dotar la Plana d’un “bèu mercat qualitatiu” per “faire montar en gamma la plaça”.
 
“Siam pas lo Pòrt Vielh ni lei Terrassas dau Pòrt. Cau preservar l’indentitat de la Plana que deu restar un quartier popular amb aquelei gents, aquelei borgés e aquelei paures, es aquò la Plana, es pas autra causa. Cau arrestar de demandar pas l’avís de la populacion e d’o far tot en privat. Devèm aver nòstre mot de dire. Per ieu cau arrestar tot aquò”, çò declara a La Marseillaise la proprietària d’una braçariá ailà. “Es important de gardar la diversitat dei luòcs, son caractèr especific. O cau pas tot unificar au profiech dau capitalisme e de l’argentàs”, çò precisa una autra vesina.
 
Mai d’informacions sus La Marseillaise.