Aquesta setmana l’ÒNU a impausat un nòu govèrn d’unitat en Libia. Aquesta organizacion mondiala quichada per los govèrns de França, Alemanha, Itàlia, Espanha , lo Reialme Unit e los Estats Units a decidit, fin finala, de donar forma al nòu govèrn libian prepausat per aqueles païses per ne finir amb la rivalitat que i a demest los dos govèrns, encara presents uèi en Libia.
 
Pr’aquò las Nacions Unidas an negociat un acòrdi de patz que faga possible un govèrn libian d’unitat nacionala abans aqueste 20 d’octòbre e sens lo qual lo país poiriá tombar dins lo caos total. Lo nòu govèrn se basa sus las negociacions que s’èran fachas en Marròc recentament,  mas que solament èran emparadas per lo govèrn de Tubruq e non pas per lo de Trípol. Lo comunicat qu’a fach l’ÒNU confirma que “mai de retards dins la formacion d’aqueste govèrn solament portarà mai de patiment al pòble libian e beneficiarà sonque als terroristas que ganhan amb lo caos”.
 
Malgrat que lo nòu primièr ministre siá Faiz Siraj e qu’Abd Al Rahman al Sahwili siá estat elegit coma cap del Conselh d’Estat, tanben son estats causits dos viceprimièrs ministres. Aital, se Siraj es de l’èst del país, un viceprimièr ministre es de l’oèst e l’autre del sud. Segon l’ÒNU, ara lo Congrès de la Nacion de Trípol aurà de confirmar aquel govèrn per traire Libia de la crisi actuala. E mai, s’escartèt pas cap d’emendament a aquel acòrdi.
 
Totun, ja son aparegudas las primièras voses opausadas a l’acòrdi: lo Congrès de la Nacion, plaçat en Trípol, ja a confirmat qu’eles fan pas partida d’aquel acòrdi e que ne vòlon pas far partida pr’amor que “son pas estats consultats en nat moment”. E mai, an dich qu’“aquel govèrn impausat per l’ÒNU es sonque una farsa”, e an criticat lo delegat de l’ÒNU, l’espanhòl León, per voler impausar un acòrdi abans la fin del sieu mandat”.
 
 
Un país enfonzat dins lo caos
 
L’ÒNU es arribada a aquesta decision pr’amor que Libia demòra una situacion de guèrra civila dempuèi agost de 2014, quand una aliança d’armadas de Misrata, pus coneguda coma l’Alba de Libia, conquistèt la capitala, Trípol, e lo govèrn reconegut per l’Occident fugiquèt a Tubruq. Dempuèi aquel moment, lo país a dos govèrns que luchan entre eles. Un a lo de sosten de l’Arabia Saudita e de l’Estat Islamic e l’autre d’Euròpa e dels Estats Units.
 
Mas la posicion de las Nacions Unidas comença d’èsser imperativa: “la comunautat internacionala”, çò diguèt un comunicat d’aquela organizacion, “portarà sosten a aqueste Acòrdi Nacional que vòl portar la patz e l’estabilitat en Libia e qu’isolarà aqueles que sián pas d’acòrdi amb el”. E mai, enebiguèt que “cap d’arma entrèsse pas dins lo país se non èra per demanda del nòu govèrn, en acòrdi amb los tèrmes del nòu acòrdi politic de Libia”. 
 
Ara los parlaments de Tubruq e de Trípol encara an d’aprovar los noms del nòu govèrn que lo prepausa l’ÒNU per formar un unic govèrn libian. E o an de far lèu pr’amor qu’Euròpa pensa que Libia poiriá tombar aviat dins un estat falhit. Fa ja mai de quatre ans que Muammar Al Qadhdhafi foguèt tuat dins lo soslevament del pòble libian e encara non s’es pas pogut formar cap de govèrn unitari. Pr’aquò ara l’ÒNU vol un sosten total a aquel nòu govèrn, pr’amor que dison que non se pòt pas despensar mai de temps ara, pr’amor que Libia pòt arribar lèu al collapse.
 
 
 
 
Christian Andreu