Après lo barrament de qualques centralas nuclearas, la produccion d’energia d’Alemanha deu provenir, dins uèch ans, de fonts renovelablas per 35% de la produccion. Per rapòrt al rèsta de la produccion, lo ministre de l’environament pensa de bastir de centralas de carbon. En mai d’aquò, per 2050, se prevei que lo percentatge de produccion renovelabla puège a 80%. Mas, ara per ara, Alemanha prevei la dobertura de 23 nòvas centralas de carbon, amb una capacitat de mai de 24 000 megawatts.

Fa mai d’un an que s’aprovèt en Alemanha la transicion energetica amb la tòca de remplaçar, dins qualques annadas, l’energia nucleara e la del carbon per las dichas energias netas, mai que mai per l’idroelectrica e per la solara.
 
Uèch centralas nuclearas son estadas ja barradas. Ça que la, lo carbon contunha d’èsser una ressorsa fòrça enrasigada dins la produccion energetica. En fach, representa 43,5% de la produccion energetica.
 
Segon lo ministre alemand de l’environament, Peter Altmaier, aquelas estimacions se mantendràn dins lo temps, e mai aja ordenat de bastir de nòvas centralas electricas de carbon. “Se se produsís 35% de l’energia d’un biais renovelable, 65% deu contunhar d’èsser produsida de faiçon tradicionala. Per aquò, cresi qu’a de sens de remplaçar las centralas contaminantas de carbon de pèira per d’usinas de carbon e de gas, modèrnas e eficientas”, çò diguèt lo ministre.
 
Alemanha prevei la dobertura de 23 nòvas centralas de carbon, amb una capacitat de mai de 24 000 megawatts. Greenpeace calcula qu’aquelas usinas expulsaràn una quantitat de CO₂ de qualques 150 milions de tonas per an.
 
Lo fach que lo ministre de l’environament pense ara de bastir aquel tipe de centralas a desencadenat las criticas de l’oposicion e dels ecologistas, que veson en aquelas nautas emissions de CO₂ un factor que contribuís a agravar lo cambiament climatic. “Qui que siá que considère seriosament la politica energetica e lo cambiament climatic pòt pas èsser en favor de las centralas de carbon”, çò diguèt Jürgen Trittin, deputat dels Verds al Bundestag.
 
“Avèm paur que lo bastiment de centralas de carbon pòsca arribar d’empedir la transicion vèrs las energias renovelablas, pr’amor qu’aquelas centralas pòdon demorar activas pendent qualques 40 ans”, çò diguèt Gerald Neubauer, expèrt energetic de Greenpeace en de declaracions a Deutsche Welle.
 
Dins las setmanas venentas, d’acamps de protèsta se debanaràn dins las regions de Lusàcia, Renània e Saxònia-Anhalt, ont i a las tres minas de carbon de pèira d’Alemanha.