La posicion alemanda envèrs Turquia càmbia lèu. S’abans Berlin s’opausava plan a l’intrada d’aquel país dins l’UE, ara poiriá quitar de s’i opausar s’Ankara arrestèsse eficaçament l’èrsa migratòria actuala. Aital o a confirmat la cancelièra alemanda Angela Merkel pendent una vesita qu’a fach en Turquia aquesta dimenjada. 

Angela Merkel ditz ara qu’Alemanha poiriá quitar de s’opausar a l’intrada dels turcs dins l’Union Europèa e qu’encara poiriá menar de negociacions mai lèu per permetre  a Turquia d’intrar, s’ela complís lo sieu ròtle de frontièra reala amb los immigrants que fugisson Siria e Iraq. I a una èrsa de migracion qu’es ja considerada la pus granda qu’Euròpa a patida dempuèi 1945.
 
“I a pas cap de país que pòsca afrontar tot sol tant de refugiats”, çò diguèt la cancelièra alemanda dins una conferéncia a Istambol. “E per tant, aqueste trabalh deu èsser partejat”.  Donc l’UE pagarà fins a 3,4 miliards d’èuros als turcs e eles deuràn arrestar los mai de 2,2 milions de refugiats que demòran uèi en Turquia. Totun, tanben s’es reconegut qu’encara s’es pas formalizat cap d’acòrdi.
 
Mentretant, lo govèrn turc preferís de crear una zòna de seguretat en defòra de Turquia ont poirián demorar totes aqueles refugiats. Mas per far aquò, ja an reconegut que cal utilizar la fòrça de la violéncia, es a dire, envasir lo nòrd de Siria. “La nòstra prioritat  es d’arrestar l’immigracion illegala e de reduire lo nombre de gents que travèrsan las nòstras frontièras. E per tant discutissèm encara amb l’UE”, çò confirmèt lo primièr ministre turc Ahmet Davotuglu.
 
 
Una pòrta dobèrta
 
Dempuèi 2011, quand comencèt la guèrra civila siriana, Turquia a totjorn agut una politica de pòrtas dobèrtas amb los refugiats. Mas ara los europèus semblan d’intrar dins una nòva crisi e los turcs se son sarrats per negociar amb l’Union Europèa lo prètz de pagar. La tòca d’Ankara es clara: intrar lèu dins l’UE. Totun, las negociacions amb Brussèlas per intrar en aquel club economic son arrestadas dempuèi 2005 per de problèmas tocant los dreches umans.
 
Euròpa vòl que Turquia arrèste aquela nòva èrsa de migrants que fugisson vèrs Grècia e qu’a fach que Turquia venga lo país qu’a mai de refugiats de tota la planeta. E se Turquia vòl intrar dins l’UE, tanben cal que i aja de libertat d’expression, çò que, ara per ara, i es pas. “Turquia vòl assegurar qu’es un país amb de seguretat mas encara i a fòrça violéncia, e dire que Turquia uèi es un país segur es una badinada”, çò diguèt Andrew Gardher, d’Amnestia Internacionala.
 
“I a agut una creissença de la violéncia entre l’armada turca e lo Partit dels Trabalhadors de Curdistan (PKK) e tanben una deterioracion dels dreches umans dins tot lo país”, çò apondèt. Aital, s’Euròpa vòl ajudar los refugiats e tanben los turcs, primièr li cal aver mai de respècte pels dreches umans, senon eles tanben se veiràn deteriorats dins l’Ancian Continent.
 
 
 
 
Christian Andreu