La vila de Pau suprimís las borsas pels estudiants, segon çò que rapòrta La République des Pyrénées. “L’ensenhament superior e la vida estudianta non son pas ua competéncia municipala mes regionala e, compte tengut de las constrentas budgetàrias, la vila se recentra sus las soas competéncias e missions obligatòrias”, çò ditz la comuna de Pau al jornal bearnés. E justifica que las somas estalviadas pemetràn de melhorar la vida dels enfants escolarizats e d’imaginar d’accions per l’insercion dels joves. Segon lo primièr cònsol de Pau, François Bayrou, “non ei pas ua supression mes ua reorganizacion”.
 
Fins a l’an passat la vila aviá atribuit 223 borsas municipalas dont un desenat èran per far d’estagis a l’estrange. Un total de 42 borsas èran de 920 èuros e la mejana èra de 200 èuros.
 
Ara, la vila precisa als estudiants “qu’en cas de dificultat se pòden adreiçar au CROUS, a l’Ostau de la Solidaritat departamentala deu lor quartièr, e tanben au Conselh Regionau d’Aquitània a travèrs deu dispositiu Aquimòb.”
 
En tot cas, far d’estudis es de mai en mai un afar reservat a las familhas fortunadas. Un estudiant qu’acomola divèrsas ajudas pòt arribar d’obténer 2000 èuros per an. Mas un estudiant deu obténer aperaquí 30 000 èuros per finançar cinc annadas d’estudis, segon un testimoniatge que publica La République des Pyrénées.