Lo primièr ministre d’Israèl, Benjamin Netanyahu, a descadenat un escandal enòrme quand diguèt publicament qu’Hitler voliá pas maselar los josieus. Malgrat l’opinion gaireben unanima sus l’Olocaust, Netanyahu a soslinhat que lo muftí de Jerusalèm, Haj Amin Al Husayni, èra colpable d’aver inculcat a Hitler l’idèa de tuar los josieus europèus. Per coronar lo tot, Netanyahu prononcièt aquelas paraulas dins lo Congrès Sionista Mondial de Jerusalèm abans ièr. L’oposicion politica e mantes josieus israelians an reagit amb energia, coma se pòt veire dins aqueste article d’Haaretz, un dels jornals de referéncia d’Israèl.
 
Per la comunautat palestiniana, aquel comentari es una pròva de mai de l’asirança del primièr ministre israelian. “El es capable d’absòlver Hitler per far mai marrits los palestinians”, çò creson. E mai fòrça istorians se son indignats: aquestes reconeisson que lo muftí èra clarament antijosieu mas afirman qu’el donèt pas l’idèa als nazis de maselar los josieus.
 
Dimècres passat, abans de viatjar en Alemanha, Netanyahu a retirat sos prepauses e a dich qu’el voliá pas levar las responsabilitats d’Hitler tocant la Shoah. Lo govèrn alemand a pres en carga tota la responsabilitat istorica d’Alemanha dins aquel genocidi e a demandat a Netanyahu “de cambiar pas l’istòria”. La pòrtavotz del govèrn alemand a dich que “totes los alemands coneisson l’istòria e l’obsession raciala assassina dels nazis que los menèt a aquela trencadura de la civilizacion que signifiquèt l’Olocaust.”
 
Vaicí lo vidèo de las declaracions de Netanyahu: