La victòria del Movement Nacional de Liberacion d’Azawad (MNLA) e la proclamacion d’un Estat amazigh sobeiran an durat plan pauc. Lo void de poder provocat per l’escrancament de l’administracion maliana e per la manca d’experiéncia politica dels independentistas amazighs, amb la manca de reconeissença de cap de país, an provocat que de grops islamistas radicals n’ajan lo contraròtle, mai que mai Ansar Ad Din (o Ansar Eddin, Ansar Dine). Aquel grop, que contraròtla sustot qualques grandas vilas coma Tomboctó e d’autras ciutats, a procedit a l’aplicacion estricta de la sharia, en arribant dusca al cas de lapidar un parelh que manteniá una relacion sentimentala fòra matrimòni.
Pendent las darrièras setmanas, los milicians islamistas an desrocat qualques santuaris de Tomboctó, que son del patrimòni cultural de l’Umanitat, perque l’islamisme radical permet pas los santuaris consagrats als sants e a las personas religiosas. Aquelas demolicions an indignat prigondament los abitants de Tomboctó, que formavan fins ara una societat dobèrta e toleranta. Los organismes culturals internacionals, coma l’UNÈSCO, an exprimit tanben la lor preocupacion.
Après qualques setmanas, França assumirà la presidéncia del Conselh de Seguretat de las Nacions Unidas, çò qu’obligarà l’anciana poténcia coloniala d’afrontar la situacion. Dins aquel sens, e mai lo govèrn de París aja regetat una opcion militara unilaterala dins la zòna, se regeta pas una accion africana de patz amb lo sosten logistic europèu, ont l’armada francesa aja un pes important.
Davant aquela situacion, sembla pas que l’MNLA aja las condicions per prene lo contraròtle efectiu del territòri d’Azawad e per metre fin a las atrocitats dels grops fondamentalistas. Malgrat qu’a lo sosten explicit de la majoritat de la populacion, l’MNLA a pas la capacitat militara o la volontat politica de mestrejar la situacion, çò que fa perilhar lo futur del nòu Estat e la siá reconeissença de la part de la comunautat internacionala.
Dins aquel sens, la majoritat de las comunautats amazighs europèas an mostrat clarament lo lor vejaire contra l’islamizacion d’Azawad e en favor de la creacion d’un Estat laïc. Per exemple, lo Movement Amazigh de Catalonha considèra que “l’Estat d’Azawad es lo primièr poder democratic e laïc dins un territòri amazigh” e avertís del “grèu perilh a causa de la pression de las fòrças islamistas d’Ansar Ad Din e la siá aliada Al Qaida del Magrèb Islamic (AQMI)”. Tant los amics de Catalonha coma los d’autres païses europèus s’acòrdan per soslinhar que l’islamisme e totes los sieus derivats “son d’ideologias e de practicas estrangièras dins lo pòble amazigh e la siá cultura millenària”.
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
#3 E jornalet l'aufrís!
Plan mercés, Garric !
Avicèna
#2
Francament, un tèxt d'aquesta qualitat auriá tota sa plaça dins la rubrica "opinion"...
Cresi saber que la cultura amazigh non es una cultura musulmana. Per exemple, tradicionalament, los òmes i van velats (de blau) e las dònas, generalament plan bèlas e plan nòblas, i an lo pel brun deliure als quatre vents del desèrt ! Al meteis títol que non es necessari d'èsser crestian per èsser occitan, non es necessari d'èsser musulman per èsser de culltura amazigh.
Per l'islam, e donc a fortiori, per l'integrisme musulman que ne fòrça las linhas finas fins a la caricatura orrorosa, i a ça que la un autre concèpte : la Uma (que caldria prononciar coma se s'escriguèsse Oman*), es a dire "la colectivitat dels cresents de l'islam". Dieu lor oferiguèt non pas un parçan de tèrra per un parçan d'umanitat, mas "tota la tèrra — la Creacion — per tota l'Umanitat" (la qui li es fisèla, al mens, segon definicion de l'Islam : se far lo servitor d'Allah, Dieu…).
A partir d'aquestes dos concèptes, lo d'Azawad, tèrra dels Amazighs, e Uma, tèrra dels fisèls a Allah, se compren melhor la crispacion fanatica islamista contra l'Azawad. Se compren melhor d'un punt de vista definicional. Un Musulman es a l'ostal sus la Tèrra tota, oferida per Dieu en escambi de sa devocion fisèla. Fa que d'un territòri politic o d'un autre, teoricament, un musulman se'n chauta a priori. Teoricament.
Dins lo detalh, pragmaticament, caldriá saber cossí las fòrças occidentalas d'un costat, las fòrças chinesas e russas de l'autre costat, niflan lo tafanari d'aqueles movements reivindicatius, coma o fan en Siria, en Libia, en Tunisia, en Egipta, et caetera… Sens aquelas informacions, generalament pauc espandidas, me sembla complicat d'aver una compreneson clara e sanitosa de l'estat de las causas a moment donat.
Cal considerar tanben que lo movement amazigh per l'estat d'Azawad poiriá far escòla per totes los pòbles d'Africa sens estats, e sovent secutats per d'autres. Una Africa reestructurada segon sas identitats culturalas seriá probablament plan mai fòrta, coërenta contra l'establiment françafrican, americafrican, contra lo sosmarin chinés que ganha de plaça a l'ora d'ara en Africa. L'idèa d'una Africa unificada non pas mai a l'entorn de sos ancians estats colonials gangrenats de corrupcion administrativa e politica, mas a l'entorn de sas culturas, de sos pòbles, de son chuc e de son muc deu far fòrça páur als interèsses capitalistas internacionals qu'an tot a pèrdre aquí qu'esplèitan vergonhosament las riquesas del continent tot a gaireben res-non-còsta. Imaginatz un pauc, d'uranium, de niquèl, venduts a prètz de petròli per pagar dignament los Africans que los expleitan e los tiran de tèrra. Imaginatz la pèrdia sèca de pus-valguda suls interrèsses accionaris de las companhias d'espleitacion occidentalas. Imaginatz los budgèctes d'unes estats coma França que bastisson sa politica energitica sus l'uranium…
Los nòstres fraires amazighs an pas encara capitat dins sa lucha, e lo camin, per eles coma per nosautres, poiriá èsser encara plan long. Coma o cantava Robert Nesta Marley (dit Bob) "Africa untite !" Pòples solidaris… Lo nòstre Claudi Martí e Salazar li auriá respondut : "descolonizarem la tèrra, Montsegur, te drèiças pertot !".
Domatge que la religion instrumentalisada mete le desòrdre aicí coma en Iogoslavia, Irlanda nordenca, Irac...
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari