Marselha vòl privatizar las plajas de las ostalariás de luxe. Dins un plan per requalificar las 21 plajas de la capitala de Provença, que qualques unas son a l’abandon, la comuna mena una politica de revalorizacion de son litoral.
 
D’un costat, la comuna a començat la segonda fasa de renovelament de la Plaja dels Catalans, qu’es en plen centre vila. Après aver investit 3,5 milions d’èuros en demolir los bastiments vièlhs, ara son a renovelar las infrastructuras sanitàrias e doblar la superfícia de sabla. Segon las informacions de Le Figaro, la muncipalitat apondrà un dotzenat de milions suplementaris.
 
De l’autre costat, lo primièr cònsol es a examinar las responsas a la crida d’ofèrtas per causir los delegataris dels restaurants plagistas. Los resultats seràn anonciats a la fin de l’annada dins la perspectiva de dobrir l’estiu que ven. Las ostalariás Intercontinental e Sofitel Pòrt Vielh espèran que poiràn permetre a lors clients un accès a la plaja.
 
L’adjonch al cònsol delegat a la mar, Didier Raoult, cèrca de calmar los marselheses, que segon el se veiràn pas privats de plaja. Tot al contrari, vòl “prepausar aquelei novèus servicis que crearàn d’emplecs”. En tot cas, segon la lei, se pòt solament privatizar lo 20% de la superfícia d’una plaja amb de palhòtas e de matalasses pagants.
 
“Aviam ges de concession sus lei plajas qu’apartenon a l’estat. Gerissèm lei plajas l’estiu dins çò que tòca la competéncia de la comuna, es a dire: la seguretat amb lei pòsts de secors; l’igièna e la santat amb lei comuns; e la mesura de la qualitat de l’aiga. Evidentament aquò fai pas una politica de gestion dei plajas”, çò a declarat Didier Raoult a Le Figaro.