Rémi Fraisse foguèt aucit per una granada ofensiva mandada per un gendarma a Sivens (Galhaqués), sul sit del projècte de la restanca de Sivens dins la nuèit del 25 al 26 d’octòbre de 2014.
 
Un an aprèp sa mòrt, la primièra consolessa de la comuna de l’Isla d’Albigés aviá refusat qu’un omenatge foguèsse fait sul sit, al motiu qu’i aviá un risc d’afrontament amb l’FNSEA que congrèa los que son per la bastison de la restanca.
 
Pasmens, mai de 300 personas venguèron per l’omenatge que se faguèt dins la banlèga de Tolosa, a l’entorn de l’estanh de Plasença de Toish, comuna ont demorava lo jove botanista e militant ecologista. Foguèt una jornada esmoventa a l’entorn d’un pica-nica compartit, d’una minuta de silenci e de presas de paraula, en particular del paire de Rémi Fraisse. Foguèt un bèl omenatge per aquel jove, non violent e amorós de natura. Al bèl mitan del prat, i aviá una granda bandieròla ont se podiá legir “On n’éteint pas le soleil en tirant dessus”. Los organizaires, lo Collectiu Testet, la Confederacion Païsana e Attac, an demandat que la vertat siá faita subre las circonstàncias de la mòrt e que lo projècte de restanca siá abandonant al profièit d’una agricultura respectuosa de l’environament.
 
Finalament, la prefectura autorizèt l’accès a Sivens dins l’aprèpmiègjorn. Mai de 200 personas se poguèron reculhir sul luòc del drama, aprèp una caminada de qualques quilomètras dempuèi Galhac de Tarn, enrodadas per un discret mas fòrt dispositiu policièr. D’ancians membres de la ZAD (“zòna de defendre”) i avián depausat dins la setmana una escultura d’1,8 tona que representava una man obèrta amb un glòbe terrèstre.
 
 
 
 
Jean-Charles Valadier