Enrique Tovar, presentaire de la television mexicana Televisa, secutèt e insultèt dissabte en dirècte sa companha de programa Tania Reza. Pendent lo secutament, Reza se sentissiá incomòda per l’actitud de Tovar fins al moment que li toquèt una popa, e en aquel moment ela se planguèt dobèrtament e ensagèt de l’arrestar. La presentaira ensajava de contunhar la transmission del programa, mas Tovar insistissiá a la tocar. E fin finala Reza diguèt: “ieu pòdi pas pus trabalhar aital” e quitèt lo platèl. E lo presentaire encara diguèt “cresi que ma companha es un pauc ormonala”.
 

 
En seguida, Televisa publiquèt un vidèo ont Tovar e Reza explicavan que tot èra estat una badinada. Puèi la cadena los licencièt.
 

 
Dins un comunicat, diluns passat, lo grop de television mexican disiá que los dos avián explicat que “la scèna foguèt una accion, amb l’intencion de crear un contengut viral, e que los dos presentaires avián pas informat la productritz que farián aquela accion ofensiva”.
 
Mas la presentaira denoncièt dimars passat sus son compte de Facebook que Televisa l’aviá quichada per que declarèsse que lo secutament èra estat un montatge. “Malastrosament, dins aquelas situacions, i a de pressions de las entrepresas e d’obligacions de dire (o quitament d’enregistrar) que soi colpabla”.
 

 
 
En Mexic, la violéncia contra las femnas es fòrça abituala e es vengut un problèma de dimensions colossalas, amb de cases esglasiants coma los feminicidis que, dempuèi los ans 1990, afèctan Ciudad Juárez, precisament la vila ont se fasiá dissabte aquela emission.