Eth Conselh Generau d’Aran qu’a signat un convèni de collaboracion damb es Volentaris d’Aran entara organizacion dera Corsa des 15 pòbles que se celebrarà eth pròplèu 26 d’agost.

Aguest convèni qu’establís qu’es Volentaris d’Aran e introdusiràn en totes es comunicacions dera Corsa era mèrca ‘Val d’Aran Esséncia des Pirenèus’, era lengua oficiau serà er aranés (occitan d’Aran) e se relacionarà era Corsa damb bèri aspèctes deth hèt diferenciau occitan. Tanben suenharàn entà qu’era participacion sigue mès nauta qu’enes darrères edicions e eth Conselh Generau d’Aran que collaborarà ena difusion e que balharà sosten econòmic ara organizacion.
 
Era Corsa des 15 pòbles, qu’enguan celèbre era sua XVI edicion, qu’a diuèrses opcions:
 
- Caminada damb quate opcions de percors: 21km, 16km, 14km, e 5km.
 
- Corsa entà adults, en tot combinar ua maraton, e trofèu Roland Giné entàs mainatges 5km. Gessuda des Bòrdes entàs 09h entàs percorsi de 21, 16, e 14 km, e gessuda de Betlan entàs 11h entath percors de 5 km.
 
“Ei de besonh mantíer era organizacion dera Corsa des 15 pòbles pr’amor dera sua importáncia entà potenciar eth senderisme ena Val d’Aran, atau coma entà gaudir d’ua rota de trekking combinada damb era visita pes pòbles d’Aran e, degut ara sua elevada participacion, hè difusion dera Val d’Aran e a mès collabore ena desestacionalizacion deth torisme” ce manifestèc Anna Díaz, conselhèra de Torisme, Comèrç e Consum deth Conselh Generau d’Aran.
 
 
 
 
Conselh Generau d’Aran