Los rebèls sirians, qu’an lo sosten de divèrses païses occidentals, an dich qu’accèptan l’alta al fuòc prepausada per Russia fins al moment qu’aquesta arrèste los bombardaments sus eles. Aquò es estada la responsa dels rebèls sirians a l’ofèrta d’ajuda aeriana contra l’Estat Islamic.
 
“Aurián d’arrestar primièr los bombardaments que fan contra nosautres”, çò diguèt un portavòtz dels rebèls sirians que luchan contra Bashshar Al Asad, “solament aital poirem parlar d’una futura cooperacion”. Mas la posicion russa es qu’eles sonque bombardan de terroristas e pro. Pr’aquò los rebèls an respondut lèu que los russes contunhan encara uèi de bombardar d’airals ont la preséncia d’islamistas es minima.
 
Tot aquò a coma contèxt lo 30 de setembre d’ongan, quand los russes, per ajudar lo dictator sirian Bashshar Al Assad comencèron de bombardar las fòrças rebèllas sirianas, lo tresen actor militar dins la guèrra civila siriana. E mai se los rebèls demandan lo despart del president sirian, lo ministre de l’exterior rus diguèt aquel meteis dissabte que son prèstes per sosténer l’aliança rebèlla en lor lucha contra los islamistas de l’EI.
 
“Sèm prèstes per sosténer l’oposicion patriotica siriana e tanben la dicha Armada Siriana Liura contra los islamistas”, çò diguèt lo ministre rus Segei Lavrov en una intervencion televisiva, “mas la coalicion qu’a lo sosten dels Estats Units”, çò apondèt, “non vòl pas collaborar amb nosautres contra las posicions dels islamistas e aquò es una granda engana”.
 
 
Scepticisme contra l’ofèrta russa
 
“Se los russes nos vòlon ajudar”, çò diguèt Isam Al Rais, portavòtz dels rebèls, “cal que primièr arrèsten los bombardaments contra nosautres. Ja sabèm coma son los russes”, çò apondèt, “d’en primièr dison una causa e puèi ne fan una autra. Avèm pas dich que volèm pas lor ajuda, mas ara n’avèm pas de besonh”.
 
Tot aquò se passa mentre que los observadors de Human Right Watch confirmavan que los russes avián fach lo 15 d’octòbre passat un bombardament ont èran mòrts fins a 59 civils, 33 dels quals èran d’enfants. Aquela meteisssa organizacion tanben confirmèt que Russia èra a violar las leis de la guèrra e que los atacs aerians russes se devián arrestar sul pic.
 
E mentre que las fòrças governamentalas plaçadas dins la capitala del país, Damasc, luchan contra los islamistas a l’oèst e al centre d’aquela republica, tanben luchan contra l’aliança militara mai coneguda coma los rebèls liures dins l’èst e lo nòrd del país. A l’encòp, aquestes tres grops militars luchan entre eles pr’amor que vòlon far fugir los autres del país. Uèi aquela guèrra a costat ja 250 000 mòrts e 11 milions de refugiats.
 
D’un costat avèm Iran, China, Russia e l’Hizbullah qu’ajudan Al Asad; de l’autre Turquia, l’Arabia Saudita, Qatar, los Estats Units, lo Reialme Unit, Itàlia e França qu’ajudan los rebèls sirians. La preséncia de soldats d’Iran e de l’Hizbullah ja es estada confirmada sus lo territòri mentre que los autres païses ajudan militarament las diferentas faccions amb d’atacs aerians. E totes luchan, a l’encòp, contra los islamistas de l’Estat Islamic. Es una situacion que divèrses expèrts ja l’an qualificada de “preguèrra mondiala”.
 
 
 
Christian Andreu