Après sèt ans e mièg en essent embarrat, en divèrsas fasas, lo jornalista basco Jabier Salutregi sortiguèt ièr, fin finala, de la preson de Burgos (Espanha). Salutregi, director del jornal Egin, es lo sol director d’un jornal d’Euròpa qu’es estat empresonat, coma o soslinhèron ben los de Reportès sens Frontièras. Son periple judiciari comencèt l’estiu de 1998, pendent lo primièr mandat de l’èx-president espanhòl José María Aznar (PP), quand la polícia barrèt Egin, lo jornal qu’el dirigissiá e que se publicava dempuèi 1977. Après setze meses d’un macrojutjament a Madrid, Salutregi deguèt complir sèt ans e mièg de preson en tres fasas, que s’acabèron ièr amb sa sortida en libertat.
 
Dins una entrevista recenta a la revista Vice, Salutregi remembrava que foguèt lo jutge de l’Audiéncia Espanhòla, Baltasar Garzón, que foguèt encargat d’activar la dicha “operacion Persiana” contra los organismes e las entrepresas presumidament ligadas a ÈTA: “barrar un jornal dins quin estat que siá de l’UE es quitament pas una ipotèsi dins l’esperit dels ciutadans europèus, mas si que n’es una dins lo d’un espanhòl”, çò disiá.
 
Parlèt tanben amb Al Jazira, en mai passat, dins un vast reportatge sus la repression de l’estat espanhòl contra los mèdias bascos. De fach, la repression anèt fòrça mai al delà. La polícia espanhòla barrèt en 2001 la revista Ardi Beltza e en 2003 lo jornal de lenga basca Egunkaria.
 
 
Dos condemnats contunharàn de complir de penas de preson
 
Dins lo meteis jutjament contra Egin foguèron condemnats a la preson Jesus Mari Zalakain, José Luis Elkoro amb los fraires Murga, Pablo Gorostiaga amb Manu Intxauspe, ja liberats, en mai dels jornalistas Karlos Trenor e Joxean Etxeberria, que complisson encara lor condemna.