Almens sèt personas mòrtas, dont cinc enfants, es lo bilanç del naufragi d’una barca que menava aperaquí 300 refugiats de Turquia a l’illa grèga de Lèsbos. Se poguèt salvar 242 personas. I poiriá aver mai de desapareguts pr’amor que se sap pas exactament quand de mond i viatjavan.
 
A l’illa son arribadas de familhas entièras de refugiats, amb d’enfants semiinconscients, amb de simptòmas d’iportermia e amb de dificultats per respirar. Lo petit pòrt de l’illa es vengut un espital de campanha improvisat per recebre los naufragièrs que se podiá salvar.
 
Cap d’organisme administratiu a pas participat al salvament, mas solament una ONG catalana nomenada Proactiva Open Arms amb l’ajuda de pescadors turcs e grècs. Aqueles socorristas catalans solidaris se son installats a Lèsbos per salvar de vidas davant la vergonhabla inoperància de las administracions europèas.
 
Los socorristas salvavan lo mond persona per persona amb de mòtos d’aiga e los menavan als batèls dels pescadors o dels gardacòstas que los menavan al pòrt. Lo tempèri e lo freg de las aigas de la Mar Egèa son una trapèla mortala pels refugiats qu’ensajan de passar de Turquia a Grècia.