Maishanta tempsada per la lenga occitana. Qu’an vist lo gran interès portat per lo Senat, la dita “hauta assemblada” qui s’es abashaida en n’acabant viste hèit dab la possibilitat de ratificar las brigalhas de la “CELRÒM” au mesprètz deus territòris qu’es censada representar. Que caleré benlèu estar diplomat en dret constitucionau per comprene quauquarren; o tornar léger las leçons florentinas de Nicolau Maquiavèl... Lo tracanard redobtat a foncionat. De tot biaish, que saben dempuish bèra pausa que los guardians deu temple republican, especiaument lo Conselh d’Estat e lo Conselh Constitutionau, son fondamentaument opausats a las lengas deus pòbles de França. Aqueth debat avortat que sembla un aute aspècte pregond de la societat francesa “blocada”, dont parlavan dens los ans 1970. Aquò que contunha suu plan lingüistic e culturau. Mes e se’n cau estonar?
 
Aute aspècte d’aquera maishanta passa, la miaça que pesa suu jornau La Setmana. Quan recebèri lo numèro 1035 (16/10), qu’estori estomagat en vedent lo títol, en blanc sus hons negre: “E se la Setmana desapareis?” La petita e valenta “scop” (societat obrèira de produccion) Vistedit qu’a quauques tesics deus seriós. Los abonats que baishan: qu’i a dificultats tà captar joenes legidors (causa coneishuda dens la premsa en generau), per trobar un lectorat fidèu en Provença, Lemosin o Auvèrnhe, e quitament qu’entenen arcasts de quauques lengadocians qui repròchan au jornau d’emplegar tròp lo gascon. Los gascons, eths, son com pro de gents dens aqueth mond: son sarrapiastres qui ne vòlen pas guaire hicar la man au pòrtamoneda. E, per estar complet, la petita còla de La Setmana qu’a besonh de còpias per plenhar las 16 paginas setmanèras.
 
S’aquera publicacion s’estupava, que seré un maishant còp de mei a la lenga nòsta. Totun, que hè un vertadèr esfòrç, dempuish vint ans, per barrejar los subjèctes, har retrèits originaus, prepausar analisis interessantas: un prètzhèit coratjós. Haut! que la cau ajudar: Vistedit, BP 50486, 64238 Lescar Induspal Cedèx; +33(5) 59 81 02 59 o vistedit@w...
 
 
 
Joan Jacme Fénié