L’HDP pèrd un milion de bulletins de vòte mas reüssís a se manténer dins lo Parlament turc,  tòca principala del movement curd. L’AKP d’Erdoğan recupèra la majoritat absoluda. Parlam dels resultats amb Eulàlia Reguant, membre de la delegacion catalana en Curdistan.

Lo Partit Democratic dels Pòbles (HDP, pròcurd d’esquèrra) de Selahattin Demirtas e Figen Yüksekdag arribèt de se manténer dimenge dins la Granda Assemblada de la Republica de Turquia, a las eleccions anticipadas que se celebravan en aquel país. Amb lo 10,7% dels vòtes, supèra la barrièra del 10% exigida per la lei electorala turca per intrar dins lo despartiment dels sètis. N’obten un 2,41%, mens qu’a las eleccions del mes de junh. La davalada en vòtes es tanplan evidenta: de 6 milions tomba a 5 milions.
 
“L’HDP a davalat a causa de la campanha de la paur. [Al partit] comprenon que las gents an votat amb la paur de tornar als ans 1990. L’HDP a perdut de vòtes, mas a davalat tanben la participacion” dins divèrsas zònas de majoritat curda, çò explica Eulàlia Reguant, deputada de la CUP e membre de la delegacion catalana d’observaires que la Plataforma Azadí e lo CIEMEN l’an coordenada aquesta dimenjada e qu’es anada a la vila d’Agri, al nòrd-èst del Curdistan del Nòrd.
 
Aquela “campanha de la paur” a comprés de menaças als membres del movement curd, de detencions d’elegits, d’atacas violentas contra de sedenças del partit e l’atemptat d’Ankara del 10 d’octòbre contra una manifestacion coorganizada per l’HDP, que costèt la vida a mai de 100 personas.
 
Lo meteis jorn de las eleccions i aguèt “una fòrta preséncia policièra, tant d’uniformats coma de non-uniformats. Es un fach intimidatòri al moment de votar. Atanben, n’i aviá d’armats dins de collègis electorals, e mai se segon la lei devon èsser a 15 mètres”, çò explica Reguant. Las dificultats que l’HDP a patit pendent la campanha per poder transmetre lo sieu messatge e concentrar los sieus partisans contunhavan dimenge de ser: “L’HDP fasiá pas cap de rassemblament a Agri per paur dels atacs e de la repression policièra”, çò comenta.
 
“Dins de vilatges pichons”, çò contunha Reguant, “concentrèron los collègis dins un sol luòc, e aital las gents se devián desplaçar. Per exemple: 12 vilatges devián votar dins un meteis collègi.”
 
 
L’AKP recupèra la majoritat absoluda
 
Lo Partit de la Justícia e del Desvolopament (AKP, islamista conservator), del president Recep Tayyip Erdoğan, s’erigissiá dimenge coma grand ganhant de las eleccions. Amb lo 49,4% dels vòtes, preniá 317 sètis dels 550 qu’a la Granda Assemblada e recuperava, doncas, la majoritat absoluda qu’aviá perduda a las eleccions de junh, quand s’èra encalat amb sonque 258 sètis.
 
Lo CHP (socialdemocrata kemalista) manteniá la segonda posicion, amb lo 25,3% dels vòtes e 134 sètis, dos de mai qu’en junh. L’autre partit que reüssissiá ièr a intrar dins lo Parlament èra lo Partit del Movement Nacionalista (ultranacionalisme turc), amb l’11,9% dels vòtes e 40 sètis (just la mitat qu’a las eleccions anterioras).
 
Amb lo nòu scenari, cal veire se lo govèrn turc voldrà reprene las convèrsas de patz per trobar una sortida dialogada al conflicte de Curdistan. Erdoğan pòt èsser temptat d’intensificar sa deriva autoritària dels darrièrs ans. Mas Reguant ditz que de fonts de l’HDP comentavan dimenge que son “convencuts” que las convèrsas recomençaràn e que la situacion d’aqueles darrièrs meses —qu’a vist lo retorn del PKK a l’activitat armada— èra una “tactica” de l’AKP per recuperar la majoritat absoluda. L’acceptacion dels resultats de la part de Demirtas — e mai se ditz que son pas estats “ni justes ni nets”— son tanben, çò ditz Reguant, un indicador que l’HDP es encara dispausat a entamenar de negociacions amb lo govèrn turc.
 
 
 
 
 

---

Aquesta nòva es adaptada de Nationalia amb qui Jornalet ten un acòrdi de cooperacion.