Femu a Corsica (Fagam Corsega), en cap dels sondatges per las eleccions de decembre. Los autonomistas vòlon estendre l’usatge del còrs, aplicar de politicas socialas e environamentalas e refortir los ligams amb la Mediterranèa. La legislatura durarà sonque dos ans.

“Creis l’esperança”. Amb aqueles mots s’exprimissiá lo 2 de novembre Gilles Simeoni, maire de Bastia e cap de lista dels autonomistas de Femu a Corsica, que se presentan a las eleccions de decembre a l’Assemblada de Corsega amb un objectiu clar: devenir, pel primièr còp de l’istòria, la fòrça mai votada de l’illa. O disiá pas per res: un sondatge electoral publicat lo meteis jorn situa sa lista en cap de las preferéncias dels còrses.

Femu a Corsica obtendriá lo 18% dels vòtes al primièr torn e despassariá la primièra de las doas listas que las presenta la drecha francesa, la menada per Camille de Rocca Serra, que demorariá amb lo 16%. Mai luènh, l’esquèrra francesa de Paul Giacobbi seriá a egalitat al 12% amb lo Front Nacional de Christophe Canioni e amb la segonda lista dels conservators franceses —aquesta sostenguda oficialament pels partits Los Republicans e l’UDI— de José Rossi.

Segon lo meteis sondatge, tanben poirián passar al segond torn de las eleccions los independentistas de Corsica Libera (Corsega Liura), amb Jean-Guy Talamoni, qu’arribariá al 8% dels vòtes —en Corsega lo lindal requerit es del 7%—. Al limit de demorar  defòra seriá la lista del Front d’Esquèrra (comunistas franceses), precisament amb lo 7%.

Al segond torn, las doas listas de la drecha francesa poirián ganhar se fusionèsson. Ansin obtendrián la prima de sètis reservada a la lista ganhanta. Se fusionan pas, Femu a Corsica auriá la possibilitat d’ocupar la primièra posicion e d’obténer la prima.

En 2010, l’esquèrra menada per Giacobbi ganhèt 24 sètis, la drecha de De Rocca Serra 12, Femu a Corsica 11 e Corsica Libera 4.


Una Assemblada que durarà dos ans

Los deputats elegits en decembre dispausaràn solament d’un mandat de dos ans. D’efièch, en decembre de 2017, los còrses seràn tornarmai convocats a las urnas. Aquela annada, l’actuala Assemblada Territoriala e los dos conselhs departamentals fusionaràn en una unica Assemblada de Corsega, que ne recamparà totas las competéncias.

Es previsible que durant los dos ans venents, per tant, los conselhièrs territorials còrses dediquen una bona part de lor prètzfach a alestir la transicion cap al nòu modèl. Una question essenciala serà se Corsega serà capabla d’obténer de nòus transferiments de competéncias que s’apliquen de 2018 enlà.


Corsofòna e mediterranèa

Malgrat la corta durada del mandat, los autonomistas vòlon arribar al conselh executiu (govèrn de Corsega) per i aplicar un programa caracterizat per las politicas socialas, la defensa de l’environament e la projeccion exteriora de las caracteristicas pròprias de l’illa.

Dins aquel darrièr capítol, lo programa de Femu a Corsica vòl avançar cap a una “societat rapidament corsofòna”, “dobèrta als païses e culturas mediterranèus e latins”, e que “refortisca la capacitat d’integracion dels nòuvenguts”. En aquel sens, los autonomistas tanben cèrcan d’inserir l’illa “dins l’espaci mediterranèu” e particularament dins l’ais Toscana-Corsega-Sardenha. A l’escala europèa, lo programa parla de crear una “vertadièra representacion de Corsega a Brussèlas”.

Femu a Corsica aspira a transformar la nòva Assemblada en la grana d’una Corsega autogovernada, dotada “d’un estatut d’autonomia qu’incluga un vertadièr poder legislatiu, similar al qu’existís dins las regions amb identitat fòrta e dins las nacions sens estat d’Euròpa”. Actualament, l’Assemblada còrsa pòt prepausar de leis mas las pòt pas aprovar —aquesta compenténcia es exclusiva del Parlament francés—.

---

Aquesta nòva es adaptada de Nationalia, amb qui Jornalet a un acòrdi de cooperacion.