Començarà lo 23 de novembre que ven un macroprocès contra 35 militants basquistas a l’Audiéncia Nacionala de Madrid, un tribunal d’excepcion de l’estat espanhòl. Demest lo mond que seràn jutjats i a Aurore Martin e Haizpea Abrisketa, originàrias del País Basco nòrd e legalament ciutadanas de l’estat francés. Son jutjadas per lor activitat politica e en particular per la participacion a de reünions politicas, a de conferéncias de premsa o a d’articles d’opinion. L’estat espanhòl lor repròcha d’èsser militantas de Batasuna, un partit illegalizat en Espanha. Riscan entre sièis e dètz ans de preson. Lo procès pòt durar fins a la mitat de decembre.
 
Nòstres confraires de La Setmana son anats parlar amb Aurore Martin e Haizpea Abrisketa e an reculhit las impressions de las doas militantas independentistas bascas qualques jorns abans lo procès. Mai d’informacions dins l’edicion del 13 de novembre de La Setmana.