La nominacion dels ministres del nòu govèrn liberal canadian a causat un fòrt impacte. Justin Trudeau, per exemple, a nomenat per lo primièr còp un indigèna canadian coma ministre de la justícia, en un gèst important pr’amor que lo govèrn precedent aviá refusat de metre en examen judiciàriament los assassinats de fòrça femnas indigènas aquestes darrièrs ans.
 
Mas segurament la nominacion qu’a causat mai d’impacte es la del coronèl sikh Harjit Saijan coma ministre de la Defensa. Saijan es un dels tres sikhs qu’an pres lor carga de ministre mas se pòt ben remarcar lo sens especial de sa designacion. En campanha, Trudeau aviá criticat durament l’implicacion de Canadà dins la guèrra d’Iraq e lo seguidisme que lo govèrn Harper fasiá de la politica dels Estats Units. E donc Trudeau aviá promés la retirada de las tropas que i son encara. Saijan participèt a la guèrra mas es un òme nascut en Índia e pòrta totjorn un turban e un ponhal, coma o exigís sa religion.
 
Lo novèl govèrn es paritari per los òmes e las femnas, en tenent quinze de cada, e compren de ministres de totas las províncias canadianas e de divèrsas comunautats. Demest eles i a la primièra ministra qu’es musulmana, nascuda en Afganistan, dos ministres d’origina ucraïnesa, dos indigènas e tres sikhs, dont un foguèt detengut e torturat fa d’annadas en Índia en essent acusat de terrorisme. Seràn tanben ministres un veteran de guèrra, andicapat a causa d’un combat, e una persona òrba. I a sièis ministres de Quebèc, comprés lo ministre dels afars estrangièrs.