Ièr de matin, cap a 11h, una abitanta de la comuna de Montlaur (vilatge d’aperaquí 500 abitants en Corbièras Nòrd) foguèt escotelada defòra per carrièra. Los secorses arribèron rapidament sus plaça mas poguèron pas ranimar la paura femna que ja èra defuntada.
 
La victima es Sarah Wafflard, una montlauresa d’origina britanica d’un quarantenat d’ans. Es descrita coma una persona fòrça implicada dins la vida locala e associativa. Èra conselhièra municipala. Èra correspondenta de premsa del jornal L’Indépendant dempuèi dos ans. Exercissiá tanben coma traductritz e interprèta anglés-francés.
 
De las circonstàncias de l’assassinat, per ara, se sap sonque que l’acte se passèt dins lo vesinatge de l’ostal de la vila. La victima recebèt almens dos còps de cotèl. Se sap tanben que l’assassin presumit s’anèt rendre volontàriament a la gendarmariá de Trebes ont es mantengut interrogat. De las motivacions e del perfil d’aquesta darrièra persona, res non se sap encara senon qu’es un abitant de Montlaur el tanben, que i demòra dempuèi un parelh d’ans e qu’es un ciutadan espanhòl.