Una còla de ginecologia obstetrica del Centre Espitalièr Universitari de Lemòtges es a menar d’experiments sus d’empèuts d’utèr provenent de donairas defuntas. Lo 5 de novembre, l’espital lemosin recebèt l’autorizacion de l’Agéncia Estatala de la Seguretat del Medicament (ANSM segon sa sigla en francés), çò rapòrta Libération.
 
Aquel projècte de recèrca es destinat a “permetre a de las femnas nascudas sens utèr, o avent patit una isterectomia per una patologia benigna, de poder donar naissença, gràcias a un empèut d’utèr, a partir de donairas en estat de mòrt encefalica”, çò a explicat l’espital dins un comunicat.
 
L’ensag clinic que tot just comença poirà menar a un primièr empèut a la fin de 2016 e a una primièra naissença a la fin de 2018. “Portarà sus uech femnas volontàrias, recrutadas a nivèu estatau, emb daus critèris de seleccion fòrça estrictes. Las pacientas deuràn aver entre 25 e 35 ans, aver jamai agut d’enfants e èstre en bona santat”, çò precisa l’espital.
 
Fins ara Suècia es lo sol país qu’a obtengut una naissença, en setembre de 2014, en seguida d’un tal empèut, mas aquel utèr proveniá d’una donaira viva. Alavetz, la primièra naissença d’un enfant a partir d’un utèr provenent d’una donaira defunta se poiriá debanar en Occitània, gràcias a l’espital universitari de Lemòtges. Aquò tornariá l’esperança a mantas femnas sens utèr qu’an enveja d’enfantar.
 
 
 

---

Mai d’informacions sus France 3 Limousin. Greffe d'utérus à Limoges: interview du Dr Tristan Gauthier