Segon un comunicat del ministre de l’interior francés Bernard Cazeneuve, lo 29 d’octòbre passat detenguèron un òme que projectava un atemptat violent contra los militars a la basa navala de Tolon. Se tracta d’un jove de 25 ans, ciutadan de la Republica Francesa, que segon lo ministre èra “en susvelhança dempuèi un an en rason de sa radicalizacion e de son sosten public a las tèsis jihadistas”. Lo comunicat apond que l’individú “aviá cercat de se procurar de material per passar a l’acte”. Cazeneuve profiècha del comunicat per felicitar lo trabalh de la DGSI e en tot precisar qu’aquel servici d’informacion del ministèri “a fach ja 370 detencions dins l’encastre de la lucha antiterrorista”.
 
L’AFP rapòrta que lo detengut se faguèt liurar pel servici postal un paquet que conteniá un cotèl de combat e una cagola.
 
Après son interpelacion, l’òme auriá indicat que son primièr desir èra de partir far lo jihad en Siria, mas la confiscacion de son passapòrt o li empediguèt, segon çò que publica Le Figaro. Es alavetz qu’auriá decidit d’agir dins lo territòri estatal en visant “puslèu la marina estatala”. Foguèt mes en examen lo 2 de novembre.
 
Lo presumit atacant auriá agit en coordinacion amb un jihadista en Siria, segon l’informatiu de Canal Plus Le Petit Journal.