Eth Govèrn dera Generalitat a aprovat eth decret que permet agranir era contribucion economica dera Generalitat entath finançament des competéncies transferides ath Conselh Generau d’Aran en matèria de santat. Er impòrt dera ampliacion ei de 304 452 èuros annuaus, destinadi a hèr tèsta ar increment deth nombre e dera complexitat des accions sanitàries que prèste er Espitau Val d’Aran ena cirurgia ortopèdica, ena traumatologia e ena oncologia.
 
Damb aguest decret, eth Govèrn ratifique er acòrd adoptat pendent era reünion dera Comission Bilaterau Govèrn dera Generalitat-Conselh Generau d’Aran, presidida pera conselhèra de governament e relacions institucionaus, Meritxell Borràs, e eth sindic d’Aran, Carlos Barrera, eth 29 de junhsèga de 2015.
 
Era Comission Bilaterau Govèrn dera Generalitat-Conselh Generau d’Aran ei er organ permanent de relacion entre es govèrns e es administracions dera Generalitat e d’Aran e a, entre es sues foncions, era adopcion des acòrds de transferiment de competéncies damb es transmissions de bens e servicis que corresponen.
 
Carlos Barrera, sindic d’Aran, a explicat: “damb aguest ampliament dera contribucion economica ena santat, se garentís era continuitat a un servici essenciau”. Barrera a hijut: “eth Govèrn aranés priorize eth trabalh destinat a establir un modèl de finançament estable e benefic tath país; ei basic entara Val d’Aran, peth desplegament deth sòn autogovèrn e peth benèster des nòsti vesins e vesies”.
 
Eth calcul d’aguesta dotacion economica s’ei establit entà tota era annualitat e aguest acòrd ei efectiu a partir der 1 de gèr de 2015. Entar exercici 2015, aguest impòrt anarà a cargue deth Departament dera Salut. Entà exercicis futurs, aguest impòrt s’incorporarà ath capítol especific des Pressupòsti dera Generalitat entath finançament deth Conselh Generau d’Aran, e anarà a cargue deth Departament competent ena matèria de relacions entre era Generalitat e eth Conselh.
 
 
 
 
Conselh Generau d’Aran