Dempuèi quatre decènnis los cartels de la dròga an somés Mexic, mejançant la violéncia e la corrupcion institucionala. Ara un grand projècte de jornalisme de donadas nomenat Narcodata, s’es impausat la tòca de rapòrtar publicament totas las informacions disponiblas sul narcotrafec mexican, d’un biais fòrça visual e pedagogic.
 
Impulsat pel sit d’informacions Animal Político e per la plataforma collaborativa Poderopedia, Narcodata vòl representar “l'istòria recenta del crime organizat amb de visualizacions interactivas qu'explican l'aparicion dels cartels, lors caps, los conflictes entre grops, l’expansion geografica e las activitats delictivas que cometon”.
 
Aquel projècte de jornalisme de donadas nasquèt fa un an, quand Animal Político obtenguèt, amb la lei de transparéncia mexicana, un document de la Procurairiá Generala de la Republica amb totas las cellulas delictivas de Mexic e los cartels qu’aubesissián.