L’organizacion dels Jòcs Olimpics de Londres a fach retirar dels sètis qualques bandièras de nacions sens estat. Primièr foguèt lo cas del paire d’una jogaira bretona, menaçat d’èsser fòrabadit se plegava pas lo drapèl. Après, pendent la competicion de canoa-caiac, un organizaire faguèt retirar la bandièra basca a un suportaire qu’èra anat encoratjar Maialen Chourraut. L’argument? Que suls sètis son solament permesas las bandièras dels païses que participan als Jòcs. Mas que i a d’escrich tot petit dins la nòrma?

Segon los fasciculs distribuits per l’organizacion a Londres e que mençonan los nombroses articles enebits (que se pòdon pas introdusir dins las installacions ont se debanan los Jòcs) e restrenches (d’usatge restrench dins aquelas installacions), son “restrenchas” las bandièras dels païses que participan pas als Jòcs, mas amb l’excepcion “de las bandièras de nacions que se tròban jol parapluèja d’un país participant, coma Anglatèrra, Escòcia e Galas”.
 
L’organizacion especifica solament aqueles tres païses, e es dins aquela redaccion que s’emparan los qu’an fach retirar una bandièra bretona e una de basca. Lo dobte, segur, es que se l’organizacion permet d’i portar de bandièras d’Anglatèrra, d’Escòcia e de Galas perque son “de nacions que se tròban jol parapluèja d’un país participant” als Jòcs, caldriá permetre tanplan las bandièras de quina autra nacion que siá que fa partida d’un estat participant als Jòcs Olimpics, coma es lo cas de França e d’Espanha.
 
Dins aquel sens, lo jornal catalan Vilawebrapòrta que qualques unes dels sieus legeires an portat de bandièras catalanas als Jòcs e an pas agut cap de problèma.


La bandièra basca es permesa
 
Del sieu costat, Asier Odriozola, un basco que demòra en Londres, e lo sieu companh, Carol Davies, contactèron l’organizacion dels Jòcs en argumentant que se las bandièras d’Anglatèrra, Escòcia e Galas èran permesas, tanben o deviá èsser la del Bascoat. Segon lo jornal Gara, après qualques telefonadas, lo cap de premsa de l’organizacion lor respondèt a l’escrich en lor donar rason. Tanplan lor a recomandat d’estampar lo document signat per evitar que qualque autre volontari los empedisca de far ondejar lo lor drapèl.
 
Alavetz, l’organizacion de Londres 2012 mandèt una letra als suportaires bascos en admetent que las bandièras bascas son permesas. “A qui pòsca interessar: aqueste tèxt es per confirmar que, consent amb los tèrmes de la politica de las bandièras de Londres 2012, la bandièra basca es pas enebida e donc cal que siá permesa” çò ditz dins la letra David Paull, cap de comunicacion de l’organizacion dels Jòcs de Londres.