Clément Grobotek es un jove de Montpelhièr que ven d’èsser victima d’una grèva agression omofòba. Segon çò qu’explica el meteis sus son compte de Facebook, Grobotek e son companh foguèron insultats e batuts amb violéncia a la sortida d’una discotèca dins la nuèch de dimars a dimècres.  “Una veitura es passada a nòstre nivèl. Las personas a bòrd nos an insultats, nos an tractats de «marrits omosexuals». «marrits sautalangostas», «suçatz de v***». Ai reagit e respondut «Que vos arriba?». Es en aquel moment que son sortits del veïcul e que nos an agressat. Tot s’es passat fòrça lèu”. Foguèron batuts quitament al cap. Son companh demorèt inconscient al sòl amb lo cap ensagnosit. “A un traumatisme cranian e la pèl de la cara cremada d’un costat perque l’an tirassada al sòl”.


A Montpelhièr se celebrèt lo primèr maridatge omosexual del país

Montpelhièr foguèt la primièra vila d’Occitània ont se celebrèt un maridatge omosexual. Vincent Boileau-Autin e son marit Bruno venguèron lo primièr matrimòni gai de l’estat francés, lo 29 de mai de 2013, dins una ceremònia fòrça mediatizada. Un an après, Boileau-Autin faguèt sa denóncia per “injúrias de caractèr omofòb e menaças de mòrt”, segon çò qu’el meteis anoncièt suls rets socials. Sa denóncia la faguèt après las menaças que recebèt sus Twitter en seguida de son intervencion sus BFM TV, ont critiquèt La Manif pour Tous, un movement omofòb que manifèsta contra la legalizacion dels maridatges omosexuals.
 
Dins un moment ont la pensada xenofòba es a créisser dins l’estat francés, las agressions omofòbas se son multiplicadas en seguida de l’èrsa de manifestacions omofòbas qu’organizèt arunan aquel movement contra lo maridatge per totes. Aquel movement omofòb èra menat per l’umorista arpitana Frigide Barjot, coneguda per sos engatjaments religioses e omofòbs. Barjot demandèt alavetz al ministre francés de l’interior, qu’èra Manuel Valls, d’accions preventivas contra los “gropusculs identitaris”, que normalament manifestavan amb son movement contra lo maridatge per totes. Aital, lo movement contra lo maridatge per totes, que faguèt fòrça rambalh dins l’estat francés, ensagèt de s’escartar dels grèus atacs violents que patiguèron dins aqueles meses d’endreches e de collectius omosexuals o de partisans del maridatge per totes.