Mollat es la libraria mai granda de Bordèu, deu departament de Gironda e d’Aquitània. Cada estiu se cavan las cervèlas per trobar quicòm d’original per far venir lo monde dins son establiment que pensan qu’es un temple de la cultura.
Ongan an trobat una idèa de las bonas. Dins cada veirina pichona o granda de la libraria faguèron pausar de panèls de diversas colors dins un fum de lengas que son dins l’òrdre de l’abeçairòla: l’alemand, l’anglés, lo baulé, lo breton, lo chèc, lo chinés, l’espanhòl, l’esperanto, l’euskara, lo francés, lo friolan, l’hindi, l’italian, lo japonés, lo laò, lo lituanian, lo maòri, lo portugués, lo rus, lo suèc, lo turc e lo vietnamian.
Un constat es lèu fèit l’occitan es absent de la fèsta! Per qué?
Tanlèu lo constat fèit lo 6 de julh de 2012; l’autor de l’article aqueste que se passejava a l’asard Bautesard anèt demandar la rason d’aquesta anomalia:
“- Per qué i es pas la lenga del país?” çò questionèri inocentament.
“- La lenga del país es lo francés, i es!” çò respondèt espontaneament la responsabla del sector literatura de la libraria.
Quauques jorn apuèi, lo 30 de julh de 2012, i tornèri e la medisha persona ne remetèt una solada. “Es pas grèu, aguèrem pas léser de trobar quauqu’un per o far en occitan e tot batut e rebatut degun lo parla pas mai a Bordèu o en Gironda”
Aguèri de mal per m’enfetar pas e demandèri un corric per poder protestar. Dins lo messatge electronic ramentèri los 30 000 manifestants de Tolosa lo 31 de març de 2012 amb una preséncia girondina de las fòrtas. Demandèri tanben se lo breton e l’euskara èran a l’onor perque los que las parlan, los i arriba de far petar de bombas? Precisèri clarament que se los occitans son pas per emplegar la violéncia, n’an lo sadol de se deure desencusar d’existir e d’èsser los etèrnes desbrembats. Ajustèri que los occitans qu’aiman lor lenga nacionala an de picalhons que podrián anar tombar endacòm mai que non pas dins lo tirador caissa del Mollat.
Per clavar lo tot, lo corric foguèt mandat a David Grosclaude, elegit occitanista a la Region Aquitània e a tot lo malhum occitanista de Gironda.
Uèit oras après la libraria Mollat se desencusava per las paraulas de son emplegada e argumentava qu’avían pas volgut frustrar lo monde que parlan nòstra lenga. Amai se passam per la libraria seriá urosa de nos receber.
Doncas dins las setmanas que vènon, a una data qu’es de determinar, una delegacion d’occitanistas l’anarà veire per ensajar de far avançar las causas. Afar de seguir.
S’avètz enveja d’èsser de la delegacion podètz m’escriure un corric. Totun se passatz del costat de la Libraria Mollat podètz anar protestar tanben. Farà mai de pes.
Gèli Grande
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
Cada còp que vau ençò de Mollat ( un o dus còps per an, que ne damori pas a Bordèu) , los demandi : " on son los libes en occitan ?" e me responen totjorn : "ne n'avem pas, pramor que digun ne se los crompan pas." E quan los rebèqui :" se n'i a pas , segur, digun ne se'n pòt pas crompar ! ", responen : "Rai, es atau !"
Aqueste estiu, avèvan hèit un pichon canton titolat "Bòrdèu" on se trobavan hòrt libes toristics , mès quauques libes en occitan , per exemple los d'Arnaudin.
Torni sus Jornalet.com una setmana puèi e vèsi que los escambis sul libre occitan e sus Mollat s'arrestèron... Es aquò amb Internet : cal alimentar la bèstia cada jorn si que non va manjar en çò del vesin... Doncas :
# 13 L'envèja es de fargar un sit onte los aimadors e los professionals pòdon trapar d'informacions sus çò que se publica en occitan. Es la basa. A costat (coma pel Jornalet) se poiriàn trapar de criticas, de bibliografias, d'articles d'istòria literària, de presentacions d'escriveiras/es, d'ostals d'edicion o de colleccions, d'adreiças de librariàs... Causas qu'induson pas "l'eschizofrenia o l'embarament sociau" çò'm sembla...
Convèrsa de seguir : soi "open" coma se ditz a l'ora d'ara... A lèu !
E a la FNAC de Bordèu, e venen libes en occitan ? Perqué non boicotar meilèu la FNAC ?
#13 M'interessa tanben ! Nos èm pausat la question damb amics despuish quauques temps, mes pensatz que seré possible de criticar imparciaument un libre en occitan shens plonjar dens l'eschizofrenia o l'embarament sociau ? Lo cercle occitan es benlèu tròp petit ? (question qu'apèra au desbat).
Torni un pauc sul sit del Jornalet dempuèi qualques jorns (aaa, l'estiu occitan...) e vesi que se parla de mai en mai de literatura : articles recents sus Serge Pey, Reinat Toscano, la librarià Mollat, Alan de l'ors... Es una dralha que seguirà lo Jornalet ?
Segur que i a de qué dire. E de qué far ! Informar de cada sortida, presentar los libres mai interessants, far de critica vertadièra, istorica e literària, de retraches d'escriveiras/es, parlar de las/los qu'òbran per la literatura nòstra, dels rescontres a l'entorn del libre occitan... Quitament pòt venir un sit o una partida autonòma del Jornalet...
Sabi pas se i a de monde interessat per tot aquò mas ieu vòli plan participar, sustot per informar de las noveltats.
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari