Lo president francés François Hollande anoncièt ièr una seguida de mesuras frapantas en responsa als atemptats de divendres a París de part de l’Estat Islamic. Hollande afirmèt que los atacs amb bombas en Siria se perlongarián durant las setmanas venentas e demandèt ajuda als estats de l’Union Europèa e de la comunautat internacionala per bastir “una coalicion unitària” contra l’Estat Islamic. “Siria es venguda la pus granda fabrica de terroristas qu’a conegut lo Mond. França demandèt tre lo començament del conflicte que i aguèsse d’unitat per poder agir. Avèm de besonh de mai de bombardaments e de mai d’ajudas. Avèm de besonh de la participacion de totes e cal una coalicion unitària”, çò diguèt Hollande dins una declaracion prononciada dins lo congrès francés, a Versalhas. Per tant, diguèt que se trobariá amb lo president dels Estats Units Barack Obama e lo president rus Vladimir Potin per fin de se coordenar amb eles.
 
Tanben Hollande demandèt d’esperlongar l’estat d’emergéncia pendent tres meses, e mai prepausèt una reforma constitucionala e legala en França per facilitar de mesuras de contraròtle similaras sens que calguèsse tornar declarar l’estat d’emergéncia. “I aurà pas ni pausa ni trèva. Lor crime refortís la nòstra determinacion a los destruire”, çò apondèt Hollande.
 
Lo president francés prepausèt tanben de “far evolucionar la nòstra constitucion per luchar contra lo terrorisme” e soslinhèt que “quand i a una guèrra estrangièra i a fòrça competéncias transferidas de l’estat civil a l’estat militar”.
 
Dins aquel sens, prepausèt de “retirar la nacionalitat francesa als individús” agissent “contra los interèsses de França, e mai se son de franceses”. “Nos cal poder expulsar d’un biais rapid los estrangièrs que sián una menaça grèva”, çò afirmèt.
 
Dins son discors a l’assemblada, lo president francés demandèt d’“esperlongar de tres meses l’estat d’emergéncia” e demandèt amb urgéncia al primièr ministre, Manuel Valls, e als ministres de l’interior e de la justícia “de pèrdre pas una minuta” per qu’aquela mesura foguèsse possibla.
 
“Ne volèm acabar amb lo terrorisme. N’acabarem amb lo terrorisme per que França contunhe de mostrar lo camin. Es la republica que n’acabarà amb lo terrorisme”, çò clavèt.


Estat d’emergéncia dins l’estat francés: almens 170 perquisicions e 23 detencions
 
Dins l’encastre de l’estat d'emergéncia, las fòrças de seguretat francesas comencèron dins la matinada de diluns una granda operacion antijihadista. Segon la compareissença que faguèt als mèdias lo ministre de l’interior francés, Bernard Cazeneuve, se son fachas fins ara 170 perquisicions en tot deténer 23 personas, se son requisicionadas 31 armas, dont 4 de guèrra, e 104 personas son en assignacion a residéncia. Los detenguts son de personas fichadas per la polícia francesa mas pas dirèctament implicadas dins los atemptats de París.
 
A Tolosa, la polícia a fach de detencions dins lo quartièr del Miralh, ont aviá viscut Mohamed Merah, segon çò que rapòrta La Dépêche. D’autras perquisicions en Occitània se serián fachas a Montpelhièr, Lunèl, Avinhon e en Roergue, segon Midi Libre.
 
 
L’estat d’emergéncia
 
Dins l’estat francés, l’estat d’emergéncia es una situacion especiala, un biais d’estat d’excepcion que restrenh las libertats. “Conferís a las autoritats civilas de poders de polícia excepcionals tocant la reglamentacion de la circulacion e del sejorn de las personas, la barradura dels luòcs dobèrts al public e la perquisicion d’armas”.
 
Dins aquela situacion los prefèctes pòdon enebir la circulacion de personas o veïculs dins d’endreches precises a d’oraris fixats, pòdon instituir de zònas de seguretat. De son costat, lo ministre de l’interior pòt assignar a residéncia tota persona “que son l’activitat s’avere perilhosa per la seguretat e l’òrdre publics”. Se pòt barrar de salas d’espectacle, de bars e de luòcs de reünion. Se pòt ordenar de perquisicions domiciliàrias “de jorn e de nuèch” e “prene tota mesura per assegurar lo contraròtle de la premsa e de la ràdio”. Las perquisicions se pòdon far sens lo contraròtle d’un jutge.