Los atacs a París an suscitat de questions importantas sus las armas de fuòc. Particularament, n’aumentar las restriccions, s’ajudariá a prevenir los atemptats e a far mens accessiblas als criminals las armas de grand poder letal?
 
Dempuèi 1956, quand de resistents ongreses panèron a Budapèst los primièrs fusilhs AK-47 a las tropas russas, lo Kalashnikov es vengut l’arma preferida dels terroristas. Es potenta, robusta e relativament a bon mercat. Es terribla e iconica a l’encòp.
 
Lo denominador comun dels darrièrs atacs jihadistas a París, l’atrocitat comesa contra lo setmanièr Charlie Hebdo en genièr, l’ensag d’atemptat dins un tren de granda velocitat francés en agost e la campanha d’atacs de Mohamed Merah a Tolosa, en març de 2012, es la possession de fusilhs d’assaut Kalashnikov.
 
Un rapòrt de l’agéncia d’informacions Reuters de 2010 soslinhava ja lo risc que los terroristas copièsson en Euròpa los atacs coordenats de Bombai. Una tactica semblabla s’enseguiguèt al centre comercial Westgate de Nairòbi en 2013, amb la mòrt de 67 personas.
 
Malgrat l’evidéncia creissenta de l’usatge de l’AK-47 per los grops de delinquents organizats en França, e malgrat l’evidéncia d’un trafec d’armas transeuropèu significatiu, tant las autoritats francesas coma las fòrças de seguretat europèas semblan d’èsser estadas relativament lentas per afrontar la menaça.
 
 
Comèrci prospèr
 
L’Observatòri Nacional de la Delinquéncia, a París, a calculat, a partir de las confiscacions fachas fins ara, que lo nombre d’armas illegalas en França aviá aumentat a un ritme en alarmant dins los darrièrs ans.
 
En 2009, segon los rapòrts, la polícia francesa confisquèt mai de 1500 armas illegalas. L’an seguent la chifra aumentèt a 2700, e en 2013 se’n confisquèt aperaquí 3500, dont a l’entorn del 3% èran capablas de tirar automaticament.
 
Lo contraròtle “s’es enduresit” e l’Union Europèa a convertit lo combat contra lo trafec d’armas de fuòc en prioritat fondamentala per l’òrdre public, fins en 2017. Pasmens, la Comission Europèa a reconegut dobèrtament que i a “una manca d’estatisticas e d’informacion solida dins tota l’Union Europèa”, e aquò fa que lo problèma es de mal afrontar.
 
Las estimacions suggerisson que mièg milion d’armas de fuòc perdudas o panadas se tròban encara dins de luòcs introbables dins l’Union Europèa, una chifra que compren quitament pas los fusilhs AK-47 supausadament escampilhats per tota l’Euròpa occidentala coma eiretatge dirècte de la casuda de l’Union Sovietica e de las guèrras dels Balcans.
 
La vila de Marselha a experimentat pendent fòrça ans de violéncias amb d’armas letalas. Generalament l’an associada amb lo trafec de dròga e las bandas del crime organizat, qu’emplegan sovent d’AK-47. Segon un pòrtavotz de la polícia de la vila, entrevistat en 2012, per un nèrvi, possedir un Kalashnikov èra vital se voliá que lo prenguèsson seriosament coma membre d’un grop.
 
E encara pièger: los AK-47 son venguts frequents al nòrd d’Africa, mai que mai après la casuda de l’URSS e lo transferiment incontrarotlat dels sieus depauses d’armas vèrs de regims del nòrd d’Africa (coma la Libia de Qadhdhafi). Tanben se’n trafega regularament dempuèi los Balcans.
 
Mai recentament, las actualizacions militaras russas de l’AK-47 an aumentat l’ofèrta dels modèls mai ancians sus lo mercat “gris” e illegal de las armas de fuòc. Lo flux despassa largament los esfòrces vacillants que se fa en èx-Iogoslavia.
 
Amb lo contraròtle insufisent de las armas d’assaut, en seguida de la demanda creissenta venent de la radicalizacion islamista, las fòrças de seguretat francesas se son trobadas obligadas d’exercir un ròtle mai reactiu per de verificar l’afluéncia d’armas de fuòc illegalas.
 
Ja s’es vist qualques reüssidas. En decembre de 2013 i aguèt 45 detencions quand la polícia desmantelèt un ret internacional de trafec d’armas, amb la participacion de connexions balcanicas e eslovacas que provesissián d’armas militaras a de grops del crime organizat de Marselha. E en octòbre de 2014, se capturèt de centenats d’armas de fuòc illegalas dins una seguida de perquisicions fachas per eliminar 48 suspèctes que ne provesissián per Internet a de grops organizats, tanben de Marselha.
 
Mas lo comèrci illegal contunha e es pauc probable que cèsse s’òm arrèsta los trafegants. Las cadenas de provesiment de l’Euròpa de l’Èst an demostrat d’un biais consistent que son plan dispausadas a satisfar quina demanda que siá, venga d’ont venga.
 
 
 
 
Peter Squires
Professor de criminologia de l’Universitat de Brighton
 
 

---

Aqueste article es estat publicat originàriament en anglés dins The Conversation.