Los atemptats de París an fach pojar la tension sociala que se viu en Occitània. Ièr a Marselha se debanèt una seguida d’agressions racistas dont cal soslinhar l’ataca d’una joventa musulmana e d’un professor josieu, coma o rapòrta Libération.
 
La gojata se faguèt batre a la sortida del mètro Castelana, al centre vila. Un jove d’aperaquí 20 ans sautèt sus ela, l’escotelèt al torax amb un cutèr e li donèt un còp de ponh a la cara. L’agressor reprochava lo mocador que cobrissiá los cabels de la gojata e liava tota aquò amb los atemptats de París. La joventa foguèt menada a l’espital e l’agressor es activament recercat per la seguretat departamentala.
 
Un pauc mai tard, a l’entorn de 20 oras, un professor d’istòria d’una escòla josieva del 13n arredondiment se faguèt ferir al braç e a una camba per dos òmes, per carrièras. Los agressors arribèron sus un escotèr e s’arrestèron a la nautor de l’ensenhaire, que portava una quipà. Los nèrvis l’insultèron, li mostrèron una camiseta de l’Estat Islamic e arborèron sul telefòn mobil una fòto de Mohamed Merah. Puèi fugiguèron e ara son tanplan recercats per la seguretat departamentala.
 
Aquelas doas agressions fan seguida a un començament de setmana particularament tibat dins la capitala de Provença, ont las intimidacions se son multiplicadas dempuèi los atemptats de París. Diluns, un jove de 23 ans cridèt mai d’un còp “Allahu akbar” (“Dieu es grand”) a de policièrs e foguèt jutjat en compareissença immediata e condemnat a un an de preson ferma.
 
Apareisson de mai en mai per tot lo país de tags islamofòbs.