Los policièrs qu’o desiran, desenant pòdon portar l’arma en defòra de lors oras servici, dins l’encastre de l’estat d’emergéncia, segon çò que rapòrta France Bleu, en tot mençonar una informacion del cap del servici d’informacion e comunicacion de la polícia estatala francesa. O confirman BFMTV e France Inter.
 
“Los policièrs en servici asseguran aquela seguretat mas los policièrs sus lor luòc de residéncia, sul trajecte, tanben pòdon participar a la lucha contra lo terrorisme e a la seguretat del nòstre país”, çò declarèt Jean-Marc Falcone, director general de la polícia estatala. “Es una fòrta demanda dels policièrs, es pas un subjècte impausat per l’administracion. O desiran es tot a lor onor”, çò apondèt, en tot precisar que los agents pòdon emplegar lor arma en tot moment “a condicion de respectar lo drech e las règlas de la legitima defensa”.
 
 
Lo Parlamanent a aprovat la prolongacion de l’estat d’emeregéncia
 
Los deputats de l’Assemblada Estatala francesa aprovèron aqueste dijòus passat un projècte de lei que refortís l’estat d’emergéncia declarat pel president François Hollande dempuèi divendres de ser. Aquel tèxt ara serà somés al Senat en vista d’una adopcion definitiva, e prevei la prolongacion de l’estat d’emergéncia dusca a la fin de febrièr.
 
 
Las proposicions d’Hollande per perennizar l’estat d’excepcion
 
Lo president francés François Hollande anoncièt diluns passat una seguida de mesuras frapantas en responsa als atemptats de divendres a París de part de l’Estat Islamic. Hollande afirmèt que los atacs amb bombas en Siria s’esperlongarián durant las setmanas venentas e demandèt ajuda als estats de l’Union Europèa e de la comunautat internacionala per bastir “una coalicion unitària” contra l’Estat Islamic. “Siria es venguda la pus granda fabrica de terroristas qu’a conegut lo Mond. França demandèt tre lo començament del conflicte que i aguèsse d’unitat per poder agir. Avèm de besonh de mai de bombardaments e de mai d’ajudas. Avèm de besonh de la participacion de totes e cal una coalicion unitària”, çò diguèt Hollande dins una declaracion prononciada dins lo congrès francés, a Versalhas. Per tant, diguèt que se trobariá amb lo president dels Estats Units Barack Obama e lo president rus Vladimir Putin per fin de se coordenar amb eles.
 
Tanben Hollande demandèt d’esperlongar l’estat d’emergéncia pendent tres meses, e mai prepausèt una reforma constitucionala e legala en França per facilitar de mesuras de contraròtle similaras sens que calguèsse tornar declarar l’estat d’emergéncia. “I aurà pas ni pausa ni trèva. Lor crime refortís la nòstra determinacion a los destruire”, çò apondèt Hollande.
 
Lo president francés prepausèt tanben de “far evolucionar la nòstra constitucion per luchar contra lo terrorisme” e soslinhèt que “quand i a una guèrra estrangièra i a fòrça competéncias transferidas de l’estat civil a l’estat militar”.
 
Dins aquel sens, prepausèt de “retirar la nacionalitat francesa als individús” agissent “contra los interèsses de França, e mai se son de franceses”. “Nos cal poder expulsar d’un biais rapid los estrangièrs que sián una menaça grèva”, çò afirmèt.
 
Dins son discors a l’assemblada, lo president francés demandèt d’“esperlongar de tres meses l’estat d’emergéncia” e demandèt amb urgéncia al primièr ministre, Manuel Valls, e als ministres de l’interior e de la justícia “de pèrdre pas una minuta” per qu’aquela mesura foguèsse possibla.
 
“Ne volèm acabar amb lo terrorisme. N’acabarem amb lo terrorisme per que França contunhe de mostrar lo camin. Es la republica que n’acabarà amb lo terrorisme”, çò clavèt.