Quinze personas moriguèron e mai de 50 foguèron de feridas, dimècres passat, dins un doble atemptat a un mercat de Kano, al nòrd de Nigèria. Segon la polícia, las autoras de l’atemptat foguèron doas gojatas kamikazes. “Doas dròllas d’11 e 18 ans, qu’una portava lo vel, s’immolèron, una dins lo mercat e l’autra a l’exterior”, çò expliquèt lo pòrtavotz de la polícia. L’atemptat causèt 15 mòrts e 53 ferits. Se privilègia l’ipotèsi qu’aquò es òbra de Boko Haram, ja qu’aquel grop utiliza regularament de dròllas per orgnizar sos atemptats suicidaris.
 
Fa sièis ans que Boko Haram fa d’atacs en Nigèria, en tot causar aperaquí 17 000 mòrts e 2,6 milions de desplaçats. L’atac a Kano se produguèt un jorn après un autre atac qu’aviá daissat almens 32 mòrts a Yola, al nòrd-èst.
 
 
Armas de fabricacion francesa
 
La polemica sus l’origina de las armas de Boko Haram se lancèt en març passat quand lo ministre de la comunicacion de Chad, Hassan Sylla Ben Bakari, indiquèt que “lo 40% de las armas sasidas per las fòrças armadas de Chad als combatents de Boko Haram son de fabricacin francesa”, segon çò que raportava Afrik.com. L’anóncia se faguèt oficiala lo 4 de març a Yaoundé, a l’ocasion d’una vesita de trabalh en Cameron. De son costat, son omològ cameronés o confirmèt. “Cap de país african fabrica pas aquelas armas. Totes los païses africans crompan las armas a França, a Russia o als Estats Units”, çò diguèt.
 
 
Boko Haram: una sècta jihadista
 
Fondat en 2002 a Maiduguri, dins lo nòrd-èst del país, lo movement religiós armat islamista nigerian Boko Haram ten un nom en lenga hausa, que significa “L’educacion occidentala es un pecat” o “es interdicha”. Tanben es conegut per un nom arabi que significa “las Gents Engatjadas per la Propagacion dels Ensenhaments del Profèta e pel Jihad”. Boko Haram quita pas de semenar la terror dins l’estat federal de Nigèria —e en Cameron, Nigèr e Chad—  per fin d’impausar pertot la sharia. Los aperaquí 9000 milicians de la sècta jihadista combaton l’administracion nigeriana, tant l’armada coma las escòlas e las universitats. Nigèria es dirigida despuèi 2010 (en seguida d’un interim, confirmat per l’eleccion presidenciala de 2011) pel crestian Goodluck Jonathan. Lo govèrn federal a tanben d’acarar, dins lo sud, la rebellion del Movement per l’Emancipacion del Dèlta de Nigèr (MEND, Movement for the Emancipation of Niger Delta), que se revendica del socialisme democratic e que lucha amb las armas contra los interèsses de las societats estrangièras qu’extrason lo petròli nigerian. Cal saber que Nigèria, lo país mai poblat d’Africa —a l’entorn de 170 milions d’estatjants—, produtz de petròli e n’expòrta… mas ten pas nada refinariá per produire son carburant, qu’es obligat de l’importar. Nonmàs un quart de la populacion nigeriana benefícia de la produccion petrolièra mentre que lo país patís de problèmas de corrupcion e de fugida dels capitals qu’aumentan las tensions etnicoreligiosas.
 
Dins lo nòrd de Nigèria, de majoritat musulmana —los crestians son majoritaris dins lo sud—, la sècta Boko Haram, que bandiguèt una temptativa d’insurreccion dins los estats del nòrd en 2009, s’illustra tristament per de mesfaches sovent qualificats de crimes contra l’umanitat: destruccion de glèisas o de vilatges, atemptats contra d’estacions de trens o d’ostalariás, chaples de populacions —en particular crestianas, minoritàrias dins l’airal—. L’an passat, per illustrar son nom hausa, sequestrèt dins d’òrras condicions 237 liceanas de Chibok, çò qu’esmoguèt la comunautat internacionala. Boko Haram anoncièt un acòrdi de liberacion per dire, fin finala, que las joventas èran estadas maridadas e convertidas a l’islam. Una liceana qu’aviá capitat a fugir contèt que sas camaradas èran violadas e que devián acceptar de se far musulmanas se volián pas èsser escoteladas.
 
 
 
 

---

De legir: Quau son los de Boko Haram? de C. Hautefeuille