Los atemptats jihadistas del 13 de novembre passat a París an fach reagir las comunautats islamicas del país, e de pertot qu’an condemnat aquela barbariá e an explicat que lor religion es pas aquò. Victimas d’una creissenta islamofobia, remembran que la majoritat de las victimas de l’Estat Islamic son los quites musulmans.

La pregària de divendres passat dins las mosquetas d’Occitània èra majoritàriament antiterrorista, en tot condemnar los atacs e se solidarizar amb las victimas. Los musulmans de pertot dins lo país se sentisson tròp tocats per aquel masèl.
 
Lo Conselh Francés del Culte Musulman (CFCM) aviá prepausat a las mosquetas de tot l’estat un “tèxt solemne” condemnant tota “forma de violéncia”. Cada comunautat adaptèt lo tèxt mas la majoritat coïncidissián per “clarificar tostemps la posicion de l’islam, per que degun pòsca pas dire al mond que la religion poiriá justificar çò injustificable”. “La barbariá jihadista nos interpèla totes perque sèm pas assostats d’aquela violéncia”, çò diguèt a Bordèu Tareq Oubrou, de l’Union de las Organizacions Islamicas de França, davant una marcha interreligiosa de 2000 personas, çò rapòrta Nice Matin.
 
 
A Canha de Mar, per las valors de la republica
 
Divendres passat, a Canha de Mar (Vencenc), los cresents musulmans se rassemblèron a la sortida de la pregària per condemnar los atemptats de l’Estat Islamic e reafirmar lor estacamant a las valors de la republica.
 
Lo conselhièr municipal PCF-FG Jean-François Téaldi i participèt per mostrar sa solidaritat amb la comunautat musulmana, que veniá d’èsser victima de qualques tags islamofòbs l’endeman dels atemptats de París. Téaldi remembrèt que la Republica Francesa es laïca e que permet la libertat dels cultes; e estigmatizèt l’islamofobia que cada jorn enebís als enfants dels musulmans d’accedir a un emplec, o los contraròtles a la fàcies repetits. Téaldi apondèt qu’una de las solucions al problèma èra la creacion d’un estat palestinian dins las frontièras de 1967.
 
 
A Lunèl, de femnas musulmanas asseguran que cal ensenhar als enfants que l’islam es pas aquò
 
Ja a Lunèl (Costièra de Nimes), un grop de femnas musulmanas manifestèt diluns passat 16 de novembre, tres jorns après los atemptats. Elas s’acampèron davant l’ostal de la comuna per denonciar los atemptats terroristas de París e per ramentar qu’aqueles actes foguèron comeses en nom d’un islam qu’es pas lo lor, çò rapòrta Midi Libre.
 
“Totas plorèrem divendres en descobrissent los imatges a la television, en pensant a totas aquelas victimas innocentas”, çò declarava a aquel jornal Leïla Said, que precisava: “devèm aprene als nòstres enfants çò qu’es lo vertadièr islam”.
 
I a de paraulas fòrtas dins lo vidèo que prepausa Midi Libre, que reprodusèm çai jos: